ԱՄՆ-ը 2015թ.-ին Վրաստանին ևս 20 միլիոն դոլար ռազմական օգնություն կտրամադրի՝դաշնակիցների երաշխիքների ուժեղացման ծրագրի շրջանակներում: Այդ մասին հայտնել է Պենտագոնի մամուլի խոսնակ Պիտեր Կուկը: Երեքշաբթի ԱՄՆ-ի պաշտպանության նախարար Էշթոն Քարթերը հանդիպում է անցկացրել իր վրացի գործընկեր Թինաթին Խիդաշելիի հետ: Կուկը նշել է, որ նախարար Քարթերը հաստատել է ԱՄՆ-ի պատրաստակամությունը շարունակել համագործակցությունը Վրաստանի հետ՝ներառյալ երկկողմ և բազմակողմ ամենամյա զորավարժություններն ու թրեյնինգները: Պենտագոնի ղեկավարը նաև հաստատել է Թբիլիսիի հետ համագործակցության Վրաստան-ՆԱՏՕ ձևաչափի ուղենիշին հավատարմությունը: Կայացած հանդիպումը Խիդաշելիի համար առաջինն էր՝Վրաստանի պաշտպանության նախարարի կարգավիճակում:
