Հայաստանի արտաքին գործերի փոխնախարար Վահան Կոստանյանը հերքել է ադրբեջանական կողմի հայտարարությունները Հայաստանի տարածքում 300 հազար ադրբեջանցիների հնարավոր վերաբնակեցման մասին: Լրագրողների հետ ճեպազրույցի ընթացքում բարձրաստիճան դիվանագետը ընդգծել է, որ երկրների միջև խաղաղության համաձայնագրի նախագծում նման դրույթ չկա:
«Ես և իմ գործընկերներն բազմիցս հստակորեն արձանագրել ենք, որ դրա մասին դրույթ պայմանագրում չկա, և դրա մասին օրակարգ չկա», - հայտարարել է Կոստանյանը՝ մեկնաբանելով Ադրբեջանի կողմից նախկինում հնչեցրած իր քաղաքացիների վերաբնակեցման ցանկությունը:
Արտաքին քաղաքական գերատեսչության փոխղեկավարը նշել է սահմանին իրավիճակի ապաէսկալացիայի անհրաժեշտությունը: Նրա խոսքով, Հայաստանը հանդես է եկել մի շարք առաջարկություններով, այդ թվում՝ սահմանային միջադեպերի համատեղ հետաքննության վերաբերյալ, սակայն «ցավալիորեն, մինչ այս պահն ադրբեջանական կողմը դրանց որևէ պատասխան չի տվել»:
«Մենք շարունակում ենք աշխատել այս ուղղությամբ, սակայն իրավիճակի առավել ամբողջական լուծումը, բնականաբար, երկու պետությունների միջև խաղաղության համաձայնագրի կնքումն է», - ընդգծել է Կոստանյանը:
Պատասխանելով համաձայնագրի ստորագրման ժամանակ երրորդ երկրի հնարավոր մասնակցության հարցին, դիվանագետը հիշեցրել է, որ բանակցությունները ըստ էության երկկողմ են ընթացել: «Մենք ադրբեջանական կողմին առաջարկել ենք քննարկել և գալ պայմանավորվածությունների՝ որտեղ և ինչ ժամկետներում ստորագրել: ՀՀ-ի համար կարևորը այս համաձայնագրի ստորագրումն է: Այս պահին որևէ առավելություն այս կամ այն մայրաքաղաքին չի տրվում», - բացատրել է նա:
Կոստանյանը նաև նշել է, որ փաստաթուղթը «հենց այս պահին ստորագրելու համար» որևէ խոչընդոտ չկա, և բազմաթիվ միջազգային գործընկերներ, ներառյալ ՄԱԿ-ի ԱԽ բոլոր անդամ պետությունները, ԵՄ գրեթե բոլոր անդամ երկրները և Մերձավոր Արևելքից ու Լատինական Ամերիկայից գործընկերներ, կողմերին կոչ էին անում «առանց որևէ հապաղման անցնել ստորագրման գործընթացին»:
Մեկնաբանելով արցախյան պատերազմի մասնակիցներին պատժելու անհրաժեշտության վերաբերյալ Ադրբեջանի հայտարարությունը, Կոստանյանը կապել է նման հռետորաբանությունը Ադրբեջանում հայ ռազմագերիների նկատմամբ ընթացող դատական գործընթացներից ուշադրությունը շեղելու փորձի հետ: «Միջազգային հանրությունը և ՀՀ-ն կոչ են անում Ադրբեջանին՝ դադարեցնել այս գործընթացները և ազատ արձակել մեր հայրենակիցներին: Դրան ի պատասխան՝ Ադրբեջանն այսպիսի հայտարարություններով է հանդես գալիս», - եզրափակել է փոխնախարարը:
Հիշեցնենք, որ ՀՀ ԱԳՆ-ն նախկինում հայտնել էր երկրի պատրաստակամության մասին Ադրբեջանի հետ խաղաղության համաձայնագիր ստորագրելու և դրա ստորագրման ժամկետների ու վայրի շուրջ խորհրդակցություններ սկսելու վերաբերյալ: Միևնույն ժամանակ, Բաքուն խաղաղության պայմանագրի ստորագրման համար առաջ է քաշում երկու նախապայման՝ Հայաստանի Սահմանադրության մեջ փոփոխությունների կատարում և ԵԱՀԿ Մինսկի խմբի լուծարում:
