Հայաստանն ակնկալում է ներդրումային հոսքերի 20 տոկոս աճ և արտահանման արմատական դիվերսիֆիկացիա՝ «Մարգարա» անցակետով Թուրքիայի հետ ցամաքային սահմանի բացման շնորհիվ: Էկոնոմիկայի փոխնախարար Անուշիկ Ավետյանը սահմանային անցակետ կատարած այցի ժամանակ ընդգծեց, որ այս ուղու վերագործարկումը թույլ կտա հաղթահարել լոգիստիկ մեկուսացումը և նվազեցնել կախվածությունը «Վերին Լարսից»: Ըստ նախնական կանխատեսումների՝ սահմանի բացումն առաջնահերթ կխթանի զբոսաշրջությունը և ծառայությունների ոլորտը, սակայն ռազմավարական առումով այն կենսական նշանակություն կունենա հայ արտադրողների համար: Տրանսպորտային ծախսերի կրճատումը և մատակարարման շղթաների պարզեցումը հայկական ապրանքներն առավել մրցունակ կդարձնեն միջազգային շուկաներում: Տասնամյակներ շարունակ փակ սահմանները եղել են լրացուցիչ ֆինանսական բեռ տնտեսվարողների համար, մինչդեռ նոր հնարավորությունը թույլ կտա ապահովել արագ և ճկուն առևտրաշրջանառություն: Տնտեսական օգուտներն ուղղակիորեն կանդրադառնան նաև ներդրումային միջավայրի վրա. փորձագետները կանխատեսում են կապիտալի ներհոսքի շուրջ 20 տոկոս աճ ոչ միայն Հայաստանում, այլև ողջ տարածաշրջանում: Ներկայումս Էկոնոմիկայի նախարարությունն իրականացնում է մանրամասն հետազոտություն՝ գնահատելու սահմանների բացման ազդեցությունը մակրոտնտեսական ցուցանիշների վրա և նախապատրաստելու հիմքեր տարածաշրջանային առավել սերտ տնտեսական փոխգործակցության համար:
