Իրանական իշխանությունները Սիրիա են գործուղել 15.000 զինված մարտիկներ, որոնք պետք է աջակցություն ցուցաբերեն սիրիական կառավարական ուժերին: Այդ մասին փոխանցում է լիբանանյան The Daily Star թերթը՝ հղում կատարելով Լիբանանի իր աղբյուրներին: Խոսքը գնում է Իրանից, Իրաքից և Աֆղանստանից մարտիկների մասին: Թերթի տեղեկություններով, օգնական ուժերը ժամանել են Սիրիա և տեղավորվել են Դամասկոսում և Լաթաքիա նահանգում: Սպասվում է, որ Սիրիա տեղափոխված մարտիկները կմասնակցեն Իդլիբ նահանգի նկատմամբ վերահսկողություն հաստատելու գործողություններին, որոնք մինչ այդ գրավել էին ծայրահեղականները: Սիրիա գործուղված մարտիկների առջև նպատակ է դրված հասնել հաջողությունների մինչև հունիսի վերջ: Նշվում է, որ մինչ այդ Լաթաքիա էր ժամանել իրանական գեներալ Քասեմ Սուլեյմանին՝ ծայրահեղականների դեմ գործողություններ նախապատրաստելու համար: «Աշխարհը կզարմանա իմանալով, թե մենք սիրիական զինվորների հետ ինչ ենք նախապատրաստել վերջին օրերի ընթացքում», - նշել է նա: Սիրիայում 2011թ.-ի մարտից շարունակվում է ռազմական հակամարտությունը, որի ընթացքում, ըստ ՄԱԿ-ի տվյալների, զոհվել է ավելի քան 200.000 մարդ: Կառավարական ուժերին դիմագրավում են տարբեր ռազմական խմբավորումներին պատկանող մարտիկներ: Ամենաակտիվը Իսլամական պետության մարտիկներն են:
