Հարությունյանին տալիս են Պերմյակովի դիմա՞ց. Փոխնախարարն է պարզաբանում
Վերջին օրերին հայաստանյան մամուլում քննարկման հիմնական թեման վերաբերում է Գյումրիում Ավետիսյանների ընտանիքի 7 անդամի սպանության համար ցմահ ազատազրկման դատապարտված Վալերի Պերմյակովի պատժի կրման կազմակերպմանը, ինչը համընկավ այն լուրերի հետ, որ ՌԴ-ում դատապարտված Հրաչյա Հարությունյանը առաջիկայում կփոխանցվի Հայաստանին: Մամուլում շրջանառվեց, թե այսպիսով Ռուսաստանը մտադիր է փոխանակել Պերմյակովին Հարությունյանով, թեև նրանց կողմից կատարած հանցանքները ուղղակի անհամեմատելի են, ուստիև չեն կարող դիտվել մեկ հարության մեջ: VERELQ-ը այս հարցերի շուրջ զրուցեց ՀՀ արդարադատության փոխնախարար Վիգեն Քոչարյանի հետ:-Պարոն Քոչարյան, վերջին օրերի լուրերի ֆոնին շատ է խոսվում այն մասին, որ ընթանում է գործընթաց, որի արդյունքում Հրաչյա Հարությունյանը կփոխանակվի Վալերի Պերմյակովի հետ: Դա հնարավո՞ր է, հաշվի առնելով նրանց գործած հանցանքների ծանրության տարբերությունը և արդյո՞ք կա փոխանակման գործընթաց:-Բացարձակապես նման գործընթաց չկա ու չի կարող լինել, որովհետև, նախ, նման փոխանակման գործընթաց ընդհանրապես հնարավոր չէ, քանզի դա հնարավոր չէ նախատեսել: Եվ նաև համաձայն եմ այն կարծիքի հետ, որ չի կարելի համեմատել Հարությունյանի և Պերմյակովի կատարած հանցագործությունները, որովհետև խոսքը լրիվ տարբեր հարթությունների վրա տեղի ունեցած ողբերգությունների մասին է և համապատասխանաբար ո’չ նմանատիպ զուգահեռներ է պետք անցկացնել, ո’չ էլ խոսել ինչ-որ այդպիսի վիրտուալ փոխանակման մասին:-Բայց հայկական կողմը պնդո՞ւմ է, որպեսզի Պերմյակովը Հայաստանում պատիժը կրի;-Մենք ունենք բավականին հետաքրքիր, ոչ մի միջազգային պայմանագրով չնախատեսված մի իրավիճակ, երբ նույն անձը դատապարտված է և’ Ռուսաստանի Դաշնության դատարանի կողմից, և’ Հայաստանի դատարանի կողմից: Եվ կարող ենք ասել, որ այս իրավիճակը համապատասխան լուծումներ է մեզանից պահանջում և ներկայումս այդ աշխատանքն ընթանում է: Նպատակը մեկն է` այդ անձը պետք է կարողանա պատիժը կրի դատարանով նախատեսված սահմաններում:-Այսինքն` հնարավոր է, որ Պերմյակովը փոխանցվի Ռուսաստանին և պատիժը կրի այնտեղ:-Այդ խնդիրները ներկայումս գտնվում են քննարկման փուլում: Ավել բան չեմ կարող ասել հենց այդ պատճառով:-Վերադառնալով Հրաչյա Հարությունյանին. օրերս Դուք մեզ հետ զրույցում ասացիք, որ նա կփոխանցվի Հայաստանին, ժամկետները հայտնի՞ են:-Ռուսաստանում փոխանցման գործընթացը որոշակի առանձնահատկություններ ունի, մասնավորապես այն, որ համապատասխան որոշում կայացնում է դատարանը: Մենք հայտարարել էինք, որ որոշակի խոչընդոտ կարմ կապված դատապարտյալի ֆինանսական պարտավորությունների հետ և ներկայումս հաջողվել է այդ խոչընդոտը վերացնել, այնպես որ ակնկալում ենք, որ գործընթացը կընթանա իր սովորական հունով և ՌԴ օրենսդրությամբ նախատեսված համապատասխան այդ փուլերը անցնելուց հետո այդ հարցը կլուծվի:
