Քննիչն ասաց, որ այսպիսի մեղադրյալ չի տեսել, որ այսպիսի լավ տրամադրություն ունի: Չի տեսել շատ պարզ պատճառով, որ ինձ վեց ամիս առաջ զգուշացրել էին, որ մի օր մեղադրանք է առաջադրվելու X, Y, Z քայլերը չանելու համար: Այս մասին ՀՔԾ քննիչի հարցաքննությունից հետո լրագրողներին ասաց Սահմանադրական դատարանի նախագահ Հրայր Թովմասյանը՝ պարզաբանելով, որ այդ քայլերը հրաժարական տալն էր:
Վերջինիս այսօր մեղադրանք է առաջադրվել:
Հրայր Թովմասյանը խոստացավ մի օր խոսել այդ ամենի մասին։ Իսկ ինչ վերաբերում է իրեն առաջադրված մեղադրանքին, ապա նշեց, որ իր կյանքում ոչինչ չի փոխվել ու չի կարող փոխվել։
«Քննիչի հետ բաժանվեցինք որպես պրոֆեսիոնալներ, ուղղակի ես իրեն ասացի, որ ցավում եմ, որ ինքը ներգրավված է ոչ թե իրավական, այլ քաղաքական պրոցեսների մեջ», - ասաց ՍԴ նախագահը։
Հրայր Թովմասյանը նաև նշեց, որ հրաժարվել է որևէ ցուցմունք տալուց և ստորագրություն է տվել չբացակայելու մասին։
«Որևէ մեկի համար գաղտնիք չէ, որ վերջին 6-7 ամիսներին Սահմանադրական դատարանն աշխատել է աննախադեպ ճնշումների ներքո։ Այդ ճնշումները ոչ միայն հայհոյախառն էին, ոչ միայն այսօրվա մասին զգուշացումներ էին, այլ կոնկրետ բռնության կոչեր էին և դրանց դրսևորումներ էին։ Բայց այս ժամանակահատվածում Սահմանադրական դատարանը, փառք ու պատիվ բոլոր դատավորներին, աշխատել է առանց որևէ խոչընդոտի և ընդունել է այնպիսի որոշումներ, որոնք բեկումնային են լինելու մեր իրավական համակարգի հետագայի համար», - հավելեց նա։
Հիշեցնենք, մեղադրանք է առաջադրվել քրեական օրենսգրքի 308 հոդվածի 2-րդ մասի հատկանիշներով՝ պաշտոնատար անձի կողմից իր պաշտոնեական դիրքը ծառայության շահերին հակառակ օգտագործելը կամ ծառայողական պարտականությունները չկատարելը, որն անզգուշությամբ առաջացրել է ծանր հետևանքներ: