Վրացական կողմը ջանքեր է գործադրում Դարիալի կիրճում մեքենաների 24-ժամյա երթևեկությունը վերականգնելու համար, որի համար նախնական տվյալներով կպահանջվի հինգ օր: Այս մասին ՀՀ վարչապետ Հովիկ Աբրահամյանի հետ հեռախոսազրույցում ասել է Վրաստանի վարչապետ Գիորգի Կվիրիկաշվիլին: Հայաստանի և Վրաստանի վարչապետները քննարկել են Դարիալի կիրճում հեղեղումների հետևանքով ստեղծված իրավիճակի և այնտեղ իրականացվող աշխատանքների ընթացքին առնչվող մի շարք հարցեր: VERELQ-ի հետ զրույցում ՀՀ վարչապետի մամուլի խոսնակ Գոհար Պողոսյանը նշեց, որ հեռախոսազրույցը Վրաստանի վարչապետի հետ տեղի է ունեցել Հովիկ Աբրահամյանի նախաձեռնությամբ: Վարչապետը շնորհակալություն է հայտնել վրաց իր գործընկերոջը`Դարիալի կիրճում իրականացվող լայնածավալ աշխատանքի, և հատկապես` հեղեղի հետևանքով ստեղծված դժվարությունների հարցում ՀՀ քաղաքացիներին աջակցելու համար:
