«Արմենիա» ավիաընկերությունը չեղարկված չվերթների ուղևորներին կառաջարկի համարժեք վաուչերներ

«Արմենիա» ավիաընկերությունը նոր տիպի կորոնավիրուսի պատճառով չեղարկված չվերթների ուղևորներին կառաջարկի իրենց տոմսերի արժեքներին համարժեք վաուչերներ մեկ տարի ժամկետով օգտագործման պայմանով։ Այս մասին Facebook-ի իր էջում գրել է «Արմենիա» ավիաընկերության փոխտնօրեն Գևորգ Խաչատրյանը։

«Հարգելի գործընկերներ և ուղևորներ, հաշվի առնելով ստեղծված իրավիճակը, չվերթների զանգվածային կասեցումը և տոմսերի վերադարձները, «Արմենիա» ավիաընկերությունը չեղարկված չվերթների ուղևորներին առաջարկելու է իրենց տոմսերի արժեքներին համարժեք վաուչերներ մեկ տարի ժամկետով օգտագործման պայմանով։ Արմենիա ավիաընկերության աշխատակազմի 95 տոկոսը գտնվում է իրենց հասանելիք և ավիաընկերության կողմից վճարվող արձակուրդում։ Ավիաընկերությունը չի հրաժարվում իր պարտավորություններից և ակնկալում է ձեր փոխըմբռնումը ստեղծված իրավիճակում։ Մաղթում ենք բոլորիդ առողջություն»,- գրել է Խաչատրյանը։

VERELQ-ը հիշեցնում է, որ ավելի վաղ «Արմենիա» ավիաընկերությունը կասեցրել էր իր չվերթների գերակշիռ մասը մինչև ապրիլի 16-ը: Չեղարկվել էին Երևան-Լիոն-Երևան ուղղությամբ բոլոր չվերթները՝ մինչև ապրիլի 16-ը և Երևան-Թել Ավիվ-Երևան ուղղությամբ բոլոր չվերթները՝ մինչև ապրիլի 9-ը: