Հռոմից Երևան ժամանողների համար օդանավակայանում ամեն ինչ տարանջատված է լինելու. Ռևազյան

Մարտի 15-ին չարթերային թռիչքով Հռոմից հատուկ չվերթով Երևան ժամանողների համար օդանավակայանում ամեն ինչ տարանջատված է լինելու, որպեսզի նրանք չշփվեն այլ ուղևորների հետ: Այս մասին այսօր՝ մարտի 13-ին, կառավարությունում կորոնավիրուսի հետ կապված արտակարգ խորհրդակցությունից հետո հայտարարեց Քաղավիացիայի կոմիտեի նախագահ Տաթևիկ Ռևազյանը։

Ռևազյանի խոսքով, կազմակերպչական փուլում են և այդ պատճառով բոլոր հարցերի պատասխաններն առայժմ չունի: «Սերտորեն աշխատոււմ են առողջապահության և արտաքին գործերի նախարարությունների հետ», - ասաց նա։

«Նախնական քանակը, մարդկանց ցուցակը արդեն ունենք, հասկանանք՝ ոնց են իրենք խմբավորված, ով ում հետ է ճանապարհորդում, ինչպես կարող ենք այդ չվերթը այնպես կազմակերպել, որպեսզի նվազեցնենք իրար վարակելու հավանականությունը»,- ասաց նա։

Այլ երկրների հետ օդային սահմանները փակելու մասին հարցին անդրադառանալով՝ Ռևազյանը նշեց, որ «օդային սահմանը փակելը երևում է քայլ, որը մեր բոլոր խնդիրները կլուծի, սակայն դա կարող է խնդիրը լրջացնել»։

Տաթևիկ Ռևազյանը անդրադարձավ նաև ավիաընկերությունների կողմից թռիչքների չեղարկմանը և ասաց, որ «դա կորոնավիրուսի վտանգի պատճառով չէ, այլ կոմերցիոն հարց է․ ժողովուրդը սկսում է քիչ ճանապարհորդել, ձեռնտու չէ»։

Ռևազյանը պատասխանեց նաև քաղավիացիայի կրած հնարավոր վտանգների մասին հարցին՝ ասելով որ «դեռ շուտ է ասել՝ ինչ վնասներ կկրի, բայց շատ լուրջ է։ Այսպիսի բան երբևէ չի եղել ամբողջ աշխարհում»։

Կիրակի՝ մարտի 15-ին, հայկական «Atlantis European Airways» ավիաընկերության կողմից Հռոմից կազմակերպվելու է չարթերային թռիչք դեպի Երևան, որի ֆինանսական ծախսերը կհոգան ՀՀ կառավարությունը, «Atlantis European Airways» ավիաընկերությունն ու «Արմենիա միջազգային օդանավակայաններ» ընկերությունը։