Ալիևի հետ Արցախը որպես բանակցային կողմ ներգրավելու մտքեր կփոխանակվեն. Փաշինյան

Իլհամ Ալիևի հետ հանդիպման օրակարգի վերաբերյալ մեր պատկերացումները չեն փոխվել։ Այս մասին ԱԺ-ում հայտարարեց ՀՀ վարչապետ Նիկոլ Փաշինյանը:

Նրա խոսքով, ինչպես նախկինում նա ասել է, սկզբնական փուլում այդ հանդիպումները կոնկրետ օրակարգ պետք է չունենան։

«Պետք է լինի հարցերի լայն շրջանակ, և այն, ինչ մեզ հետաքրքրում է, ուղղակի պետք է մտքեր փոխանակենք տարբեր հարցերի վերաբերյալ։ Քննարկումներ կլինեն նախկինում հնչած հայտարարությունների շրջանակներում»,- ասաց նա։

Վարչապետը շեշտեց՝ այն, ինչ հայտարարել է Ստեփանակերտում անվտանգության խորհրդի համատեղ նիստում, դա է այն օրակարգը, որով  գնում ենք բանակցությունների և դա է այն պլատֆորմը, որի վրա հիմնվելու ենք հետագա բանակցային ողջ գործընթացում:

Պատասխանելով ԲՀԿ-ական պատգամավոր Նաիրա Զոհրաբյանի հարցին, թե կարո՞ղ ենք ենթադրել, որ մտքերի փոխանակման գործընթացում նաև Արցախը որպես բանակցային կողմ ներգրավելու մտքեր կփոխանակվեն, վարչապետը դրական արձագանքեց.

«Այո՛, իհարկե», - նշեց նա։

Փաշինյանը նաև ասաց, որ այն մեկնաբանությունները, թե բանակցային ձևաչափի փոփոխության առաջարկ կա, չեն համապատասխանում իրականությանը.

«Դա ձևաչափի փոփոխության առաջարկ չի և չի կարող լինել», - հավելեց վարչապետը:

Ավելի վաղ տեղեկացրել էինք, որ Նիկոլ Փաշինյանը մարտի 28-29-ին աշխատանքային այցով կմեկնի Ավստրիայի Հանրապետություն: ԵԱՀԿ Մինսկի խմբի համանախագահ երկրների նախաձեռնությամբ Վիեննայում տեղի կունենա Նիկոլ Փաշինյանի հանդիպումն Ադրբեջանի նախագահ Իլհամ Ալիևի հետ: