Վճռաբեկ դատարանը բեկանեց Սամվել Բաբայանը գործով դատավճիռը. նա ազատ կարձակվի

620

ՀՀ Վճռաբեկ դատարանը քիչ առաջ բեկանեց ԼՂՀ ՊԲ նախկին հրամանատար, Արցախի հերոս Սամվել Բաբայանը գործով դատավճիռը: Բաբայանն ու այս գործով մյուս մեղադրյալ Սանասար Գաբրիելյանն ազատ կարձակվեն: Նրանց նկատմամբ կիրառվեց պատգամավորների անձնական երաշխավորությունը:


Այսպիսով՝ դատարանը գործն ուղարկեց նոր քննության, հայտնում է armtimes.com-ը:


Դատարանն այսօր քննում էր պաշտպանական կողմի բերած բողոքը, որով վերջիններս պահանջում էին բեկանել առաջին ատյանի դատարանի դատավճիռը, եւ Բաբայանի եւ մյուսների խափանման միջոց կալանավորումը փոխել:


Նշենք, որ Սամվել Բաբայանի եւ Սանասար Գաբրիելյանի կալանքը որպես խափանման միջոց փոխելու վերաբերյալ անձնական երաշխավորությամբ հանդես է եկել Ծառուկյան խմբակցության 13 պատգամավոր, ինչպես նաեւ ԵԼՔ խմբակցության պատգամավորներ Սասուն Միքայելյանը եւ Հովիկ Աղազարյանը: Պատգամավորներ Նաիրա Զոհրաբյանը եւ Վահե Էնֆիաջյանն այսօր Վճռաբեկ դատարանում մասնակցում էին բողոքի քննությանը: Բողոքի քննության ավարտին Նաիրա Զոհրաբյանը դատարանում պնդեց իրենց կողմից ներկայացված երաշխավորագիրը՝ նշելով, որ գիտակցում են դրանից բխող բոլոր հետեւանքները:


Հիշեցնենք, որ առաջին ատյանի դատարանը Սամվել Բաբայանին մեղավոր էր ճանաչել Քրեական օրենսգրքի 38-235-րդ հոդվածի 2-րդ մասով (մի խումբ անձանց կողմից ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) եւ 190-րդ հոդվածի 1-ին մասով (Հանցավոր ճանապարհով ստացված գույքն օրինականացնելը (փողերի լվացում) եւ դատապարտել 6 տարվա ազատազրկման։


Ավելի վաղ հայտնել էինք, որ ըստ մեղադրական եզրակացության՝ Սամվել Բաբայանը դրդել է մի խումբ անձանց` նախնական համաձայնությամբ ապօրինի կերպով ռազմամթերք հանդիսացող «Իգլա» տեսակի դյուրակիր զենիթահրթիռային համալիր ձեռք բերելուն, փոխադրելուն եւ պահելուն, ինչպես նաեւ՝ փոխարկման արդյունքում ձեռք է բերել հանցավոր ճանապարհով ստացված գույք:


Գործով որպես ամբաստանյալ անցնում են նաեւ Սանասար Գաբրիելյանը, Արմեն Պողոսյանը, Կարեն եւ Անդրանիկ Քոչարյանները, Ժորա Զաքարյանն ու Դավիթ Հարությունյանը:

Տպել

Թեմայի այլ նորություններ
Загрузка...