Երևանը ՀԱՊԿ-ին տեղեկացրել է Նախիջևանում Ադրբեջանի գործողությունների մասին. ԱԳՆ

Հայաստանը թույլ չի տալու դիրքային փոփոխություն սահմանի որևէ հատվածում: Լրագրողների հետ ճեպազրույցում հայտարարել է ՀՀ արտաքին գործերի նախարարության մամուլի խոսնակ Տիգրան Բալայանը` անդրադառնալով հայ-ադրբեջանական սահմանի նախիջևանյան հատվածում եղած տեղաշարժերին:

«Ինչպես Պաշտպանության նախարարության իմ գործընկերն արդեն տեղեկացրել է, այդ հատվածում վարվում են որոշակի աշխատանքներ, որոնք անմիջական վտանգ են ստեղծում մեր դիրքերի համար»,- tert.am-ի հաղորդմամբ ասել է Տիգրան Բալայանը՝ նշելով, որ դրանց տեղում ծանոթանալու համար պաշտպանության նախարար Դավիթ Տոնոյանն ու արտաքին գործերի նախարար Զոհրաբ Մնացականյանն այցելել են սահմանային այդ հատված:

ԱԳՆ մամուլի խոսնակը նշել է, որ իրենք բազմիցս զգուշացրել են թե՛ ադրբեջանական կողմին, թե՛ միջնորդներին, որ այդպիսի աշխատանքները լարում են իրավիճակը և կարող են հանգեցնել անցանկալի զոհերի:

Անդրադառնալով ադրբեջանական կողմի մեղադրանքներին իրենց զոհի համար՝ Տիգրան Բալայանը նշեց. «Ասել, որ Հայաստանի պաշտպանության և արտաքին գործերի նախարարների անմիջական ցուցումով է եղել այն հրաձգությունը, որի հետևանքով, ըստ ադրբեջանական կողմի, իրենք զոհ են ունեցել… Ես չեմ բացառում, որ իրենք զոհ են ունեցել իրենց միջանձնային հարաբերությունների պատճառով, որը փորձում են հիմա մատուցել որպես հայկական կողմից կրակոցի զոհ»:

ԱԳՆ խոսնակի պնդմամբ՝ հայկական կողմը հստակ ու հաստատակամ է՝ թույլ չի տալու դիրքային փոփոխություն որևիցե հատվածում: «Սա հստակ ուղերձ է, որը նաև իրենց այցով հղել են ՀՀ պաշտպանության ու արտաքին գործերի նախարարները»:

Նա նաև տեղեկացրեց, որ Նախիջևանի սահմանում եղած տեղաշարժերի մասին Հայաստանը ներկայացրել է ՀԱՊԿ-ին: «Այո, տեղեկացված է: Մենք տարբեր ուղղություններով այդ մասին տեղեկացնում ենք, ինչպես նաև տեղեկացնում ենք, որ այդ ամենը կարող է բերել լարման»: