Վարչապետը հանձնարարականներ տվեց արագաչափերի ու «կարմիր գծերի» մասով
ՀՀ վարչապետ Կարեն Կարապետյանն այսօր հանձնարարեց ոստիկանապետ Վլադիմիր Գասպարյանին, ըստ անհրաժեշտության ներգրավելով արդարադատության ու ֆինանսների նախարարություններին, բանակցել «Սեքյուրիթի դրիմ» ՍՊԸ-ի հետ և մեկ շաբաթվա ընթացքում ներկայացնել իրավական լուծումներ, որպեսզի այդ ընկերության գործառույթները՝ ֆինանսական հոսքերի ամբողջական տնօրինումը և կառավարումը, անցնեն պետական կառույցներին:
Նշենք, որ նախօրեին հրավիրված խորհրդակցության ժամանակ այդ անհարժեշտությունը
բարձրաձայնել էր ՀՀ նախագահ Սերժ Սարգսյանը: Երկրի ղեկավարը մասնավորապես հայտարարեց, որ մասնավորին պատկանող ֆինանսական հոսքերը և գործառույթների կառավարումը այսուհետ անցնում են պետությանն ու համայնքներին:
Կարեն Կարապետյանը հանձնարարեց նաև ֆինանսների ու արդարադատության նախարարներին` աջակցել Երևանի քաղաքապետին «Պարքինգ Սիթի Սերվիս» ընկերության հետ բանակցություններում և մեկ շաբաթվա ընթացքում ներկայացնել իրավական լուծումներ, որպեսզի այդ ընկերության գործառույթները և ֆինանսական հոսքերի ամբողջական կառավարումն ու տնօրինումը անցնեն համայնքային կառույցներին:
Նշենք, որ կառավարության նիստին զուգահեռ Երևանի քաղաքապետ
Տարոն Մարգարյանը աշխատանքային խորհրդակցություն է անցկացրել մայրաքաղաքում վճարովի ավտոկայանատեղիների կազմակերպման գործընթացի հետ կապված:
Խորհրդակցության մասնակիցներին ներկայացնելով ՀՀ Նախագահ Սերժ Սարգսյանի մոտ կայացած խորհրդակցության ժամանակ արված առաջարկները՝ Երևանի քաղաքապետը համապատասխան ոլորտների պատասխանատուներին հանձնարարել է ձևավորել աշխատանքային խումբ, որը «Փարկինգ Սիթի Սերվիս» և «Լոկատոր» ՓԲԸ կոնսորցիումի հետ բանակցությունների միջոցով կքննարկի և կմշակի հնարավոր մեխանիզմներ, որի արդյունքում վերոնշյալ ընկերությունների գործառույթները, այդ թվում՝ ֆինանսական հոսքերի տնօրինումն ու կառավարումը, կփոխանցվեն համայնքին:
«Հանրապետության Նախագահի կողմից սահմանվել է 10-օրյա ժամկետ՝ օպերատորի հետ բանակցություններ վարելու և արդյունքները ներկայացնելու համար: Ըստ այդմ, հանձնարարում եմ ֆինանսական, իրավաբանական և տրանսպորտի ոլորտների պատասխանատուներին, աշխատանքային խմբի միջոցով, «Փարկինգ Սիթի Սերվիս»-ի հետ քննարկել համայնք-մասնավոր համագործակցության ձևաչափը փոխելու հնարավորությունները», - նշել է Տարոն Մարգարյանը:
