Իրանն ու ԱՄՆ-ն հասել են միմյանց դիրքորոշումների ավելի լավ ընկալման. Աբբաս Արաղչին
Իրանի արտաքին գործերի նախարար Աբբաս Արաղչին հայտարարել է, որ Իրանի և Միացյալ Նահանգների միջև անուղղակի բանակցությունների չորրորդ փուլը, որն անցել է Մասկաթում, կրել է ավելի լուրջ և մանրամասն բնույթ՝ նախորդ հանդիպումների համեմատ: Ըստ IRNA գործակալության տեղեկատվության, դիվանագետը նշել է, որ կողմերին հաջողվել է հասնել միմյանց դիրքորոշումների «ավելի լավ ընկալման»:
Օմանի մայրաքաղաքում լրագրողների առջև ելույթ ունենալիս, որտեղ բանակցություններն անցկացվել են օմանցի պաշտոնյաների միջնորդությամբ, Արաղչին ընդգծել է, որ այս անգամ կողմերը դուրս են եկել ընդհանուր քննարկումների շրջանակներից և խորացել են կոնկրետ մանրամասների մեջ, ինչը օրինաչափորեն բարդացրել է բանակցությունների գործընթացը:
«Նախորդ երեք փուլերի համեմատ, այս նիստն ավելի առարկայական և լուրջ էր: Մենք հեռացանք ընդհանուր ձևակերպումներից և կենտրոնացանք մանրամասների վրա, ինչը, բնականաբար, բարդացրեց բանակցությունները», — նշել է իրանական ԱԳՆ ղեկավարը:
Չնայած աճող բարդությանը` Արաղչին ընդգծել է հանդիպման արդյունավետությունը. «Թեև քննարկումները դժվար էին և անկեղծ, դրանք չափազանց օգտակար էին: Կարելի է ասել, որ երկու կողմերն այժմ ավելի լավ են հասկանում միմյանց դիրքորոշումները»:
Իրանի գլխավոր բանակցողը նշել է, որ բանավեճային հիմնական հարցերը քննարկվել են ավելի խորությամբ, ինչը հանգեցրել է Թեհրանի և Վաշինգտոնի դիրքորոշումների որոշակի մերձեցման: Նրա խոսքերով, երկու կողմերը համաձայնել են շարունակել բանակցային գործընթացը:
Հաջորդ փուլի անցկացման ժամանակը և վայրը կորոշվեն երկու կողմերի գրաֆիկները հաշվի առնելով, իսկ Օմանը կշարունակի համակարգել կազմակերպչական հարցերը, ավելացրել է Արաղին:
Բանակցություններում պատվիրակությունները գլխավորում էին Աբբաս Արաղչին և ԱՄՆ հատուկ ներկայացուցիչ Մերձավոր Արևելքում Սթիվեն Ուիթկոֆը: Մասկաթում հանդիպումը տևել է մի քանի ժամ՝ Օմանի արտաքին գործերի նախարարի միջնորդությամբ:
Քննարկումները կենտրոնացած էին իրանական միջուկային ծրագրի և պատժամիջոցների վերացման վրա, որոնք հանդիսանում են Թեհրանի և Վաշինգտոնի հարաբերություններում առանցքային վիճելի հարցեր:
