Պուտինն ու Էրդողանը դատապարտել են Իսրայելի ռազմական հարվածներն Իրանի դեմ

Ռուսաստանի նախագահ Վլադիմիր Պուտինը եւ Թուրքիայի նախագահ Ռեջեփ Թայիփ Էրդողանը հեռախոսազրույց են ունեցել՝ կենտրոնանալով Մերձավոր Արեւելքում ծայրահեղ սրված իրավիճակի վրա։ Ըստ Կրեմլի մամուլի ծառայության՝ կողմերը խստորեն դատապարտել են Իսրայելի ռազմական հարվածը Իրանի դեմ՝ այն որակելով որպես միջազգային իրավունքի և ՄԱԿ-ի կանոնադրության խախտում։

Երկու նախագահներն ընդգծել են հակամարտության խորացման վտանգավոր հետևանքները ողջ տարածաշրջանի համար՝ նկատելով, որ ներկայիս էսկալացիան արդեն հանգեցրել է բազմաթիվ զոհերի։ Նրանք շեշտել են, որ իրավիճակի կարգավորումը պետք է լինի բացառապես քաղաքական և դիվանագիտական ճանապարհով, այդ թվում՝ իրանական միջուկային ծրագրի շուրջ։

Կողմերն համաձայնել են, որ երկու երկրների համապատասխան կառույցները կպահպանեն սերտ աշխատանքային կապ՝ լարվածությունը թուլացնելու նպատակով։

Զրույցի ընթացքում անդրադարձ է կատարվել նաեւ ռուս-ուկրաինական ուղղությանը․ Վլադիմիր Պուտինը շնորհակալություն է հայտնել Թուրքիային ռուս-ուկրաինական ուղիղ բանակցությունների կազմակերպման համար։ Ընդգծվել է, որ Ռուսաստանը կատարում է երկրորդ փուլից բխող բոլոր պարտավորությունները, այդ թվում՝ զոհվածների դիերի փոխանցումն ու գերիների փոխանակումը։

Քննարկվել են նաեւ ռուս-թուրքական օրակարգի ընթացիկ հարցերը, մասնավորապես՝ էներգետիկ ոլորտում։ Այս թեմաները քննարկվելու են առաջիկա համաժողովների ընթացքում՝ ներառյալ Սանկտ Պետերբուրգի միջազգային տնտեսական համաժողովն ու հունիսի վերջին կայանալիք միջկառավարական հանձնաժողովի նիստը։

Էրդողանն իր զրույցի ավարտին շնորհավորել է Պուտինին եւ ՌԴ քաղաքացիներին Ռուսաստանի Դաշնության ազգային տոնի՝ Հունիսի 12-ի կապակցությամբ։