Մենք դիտարկում ենք ԱՄԷ-ն որպես Հայաստանի առանցքային գործընկեր. Գևորգ Պապոյան

ՀՀ էկոնոմիկայի նախարար Գևորգ Պապոյանը մասնակցել է Աբու Դաբիում կայացած «Ամենամյա ներդրումային համաժողով»-ին, որի շրջանակում հանդիպում է ունեցել ԱՄԷ էկոնոմիկայի նախարար Աբդուլլա բին Թոուք Ալ-Մարրիի հետ։

Հանդիպման ընթացքում քննարկվել են երկու երկրների միջև տնտեսական կապերի ամրապնդման և ապրանքաշրջանառության ավելացման հեռանկարները։ Նախարար Պապոյանը նշել է, որ ներկայում ԱՄԷ-ն գլխավորում է Հայաստանի ամենամեծ արտահանող և ներմուծող երկրների ցանկը, ինչը վկայում է տնտեսական հարաբերությունների զարգացման դինամիկ ընթացքի մասին։

«Մենք դիտարկում ենք ԱՄԷ-ն որպես առանցքային գործընկեր Հայաստանի և Ծոցի երկրների միջև առևտրատնտեսական համագործակցության խորացման համար», - հայտարարել է Պապոյանը՝ ներկայացնելով Հայաստանի ներդրումային հնարավորությունները։

Նախարարը հատուկ ուշադրություն է հրավիրել զբոսաշրջության, վերականգնվող և կանաչ էներգետիկայի ոլորտներում համագործակցության հեռանկարներին, ինչպես նաև ներկայացրել «Խաղաղության խաչմերուկ» նախագիծը, որը կարող է դառնալ երկկողմ տնտեսական համագործակցության նոր հարթակ։