ՌԴ փոխվարչապետ Ալեքսեյ Օվերչուկը ռուսական պատվիրակության գլխավորությամբ ժամանել է Թեհրան, որտեղ կմասնակցի Կասպյան տնտեսական երրորդ համաժողովին, հաղորդում է ՏԱՍՍ-ը։ Փոխվարչապետի՝ Իրան այցի շրջանակներում նախատեսված են երկկողմ հանդիպումներ երկրի ղեկավարության հետ։ Օվերչուկի ելույթը համաժողովում սպասվում է փետրվարի 18-ին։ Միջոցառմանը մասնակցող ռուսական պատվիրակության կազմում ընդգրկված են ԱԳՆ-ի, Տնտեսական զարգացման, Տրանսպորտի, Էներգետիկայի, Բնական պաշարների, Արդյունաբերության և առևտրի, Գյուղատնտեսության նախարարությունների, Դաշնային մաքսային ծառայության և Ռուսական երկաթուղիների ներկայացուցիչները։ Մասնակիցները կքննարկեն համագործակցության լայն շրջանակ, այդ թվում՝ բանկային համագործակցություն, ներդրումներ, Կասպից ծովի ավազանի երկրների առևտրային և արդյունաբերական կապերի զարգացում, էներգետիկա, էկոլոգիական համագործակցություն, տրանսպորտային ոլորտում համագործակցություն։ Կասպյան «հնգյակի» մեջ են մտնում Ռուսաստանը, Ադրբեջանը, Իրանը, Ղազախստանը և Թուրքմենստանը։
