Թեհրանի նոր պլանը ԱՄՆ-ի համար և Արաղչիի բանակցությունները Մոսկվայում

Դիվանագիտական փակուղու ֆոնին Թեհրանը Վաշինգտոնին է ներկայացրել հակամարտության կարգավորման նոր եռափուլ նախաձեռնություն՝ առաջարկելով հետաձգել միջուկային հարցը հանուն անհապաղ զինադադարի։ Մինչ ԱՄՆ վարչակազմը վերանայում է բանակցությունների ձևաչափը, իրանական դիվանագիտությունն իր ուշադրությունը կենտրոնացնում է Մոսկվայի վրա՝ բարձրագույն մակարդակով խորհրդակցությունների համար։

Միջազգային պարբերականների փոխանցմամբ՝ Իրանի ղեկավարությունն առաջարկել է Միացյալ Նահանգներին բանակցային գործընթացը բաժանել երեք հաջորդական փուլերի։ Ըստ աղբյուրների՝ առաջին փուլը ենթադրում է ռազմական գործողությունների ավարտ և անվտանգության երաշխիքների տրամադրում Թեհրանին ու Լիբանանին։ Երկրորդ քայլը կնվիրվի Հորմուզի նեղուցի համատեղ կառավարմանը, և միայն երրորդ փուլում կողմերը կկարողանան վերադառնալ իրանական միջուկային ծրագրի քննարկմանը։ Լրագրողներն ընդգծում են, որ այս ռազմավարությունը կոչված է շրջանցելու միջուկային զիջումների վերաբերյալ Թեհրանի ներքին տարաձայնությունները, սակայն շրջափակման վերացումը հետագայում կարող է զրկել Վաշինգտոնին ճնշման առանցքային լծակներից։

ԱՄՆ նախագահ Դոնալդ Թրամփն արդեն հասկացնել է տվել, որ մտադիր է պահպանել կոշտ կուրսը և շարունակել տնտեսական շրջափակումը՝ Իրանին փոխզիջումների պարտադրելու նպատակով։ Ամերիկացի առաջնորդը նաև հայտարարել է Պակիստանում երկկողմ հանդիպումներ անցկացնելուց հրաժարվելու մասին՝ չեղարկելով իր հատուկ բանագնացներ Սթիվեն Ուիթքոֆի և Ջարեդ Քուշների ծրագրված այցը Իսլամաբադ՝ երկարատև թռիչքների աննպատակահարմարության պատճառով։ Ակնկալվում է, որ առաջիկայում Սպիտակ տանը կանցկացվի ազգային անվտանգության հարցերով արտահերթ խորհրդակցություն՝ հետագա քայլերը մշակելու համար։

Այս իրադարձությունների լույսի ներքո Իրանի արտաքին գործերի նախարար Աբբաս Արաղչին լքել է Պակիստանը և աշխատանքային այցով մեկնել Ռուսաստան։ Կրեմլի և իրանական դեսպանատան ներկայացուցիչները հաստատել են, որ Մոսկվայում կկայանան ռազմավարական խորհրդակցություններ երկկողմ հարաբերությունների, տարածաշրջանային անվտանգության և ԱՄՆ-ի հետ ընթացիկ հակամարտության հարցերի շուրջ, որոնց շրջանակներում նախատեսված է Իրանի դիվանագիտական գերատեսչության ղեկավարի անձնական հանդիպումը նախագահ Վլադիմիր Պուտինի հետ։