ԱՄՆ կառավարական շրջանակներում Reuters-ի աղբյուրները հաստատել են ավելի վաղ New York Times-ի տարածած տեղեկատվությունն այն մասին, որ Դոնալդ Թրամփի ընտրարշավի մասնակիցները կապի մեջ են եղել Ռուսաստանի հատուկ ծառայությունների հետ: Այդ կապերը, ինչպես հայտնում է «Բի-բի-սի»-ն, իբրեւ թե ֆիքսվել են անցայլ տարվա ընթացքում եւ մինչեւ նոյեմբերին ԱՄՆ-ում կայացած նախագահական ընտրությունները, որոնց արդյունքնում հաղթանակ տարավ հանրապետական Դոնալդ Թրամփը: Reuters-ի զրուցակիցների թվում են կառավարության հինգ նախկին եւ գործող աշխատակիցներ, որոնց անունը գործակալությունը չի բացահայտում: Օրեր առաջ հղում կատարելով իր աղբյուրներին՝ նմանատիպ տեղեկատվություն հրապարակեց New York Times թերթը: Թերթի տվյալներով, ամերիկյան հետախուզությունը գաղտնալսել է հանրապետական թեկնածուի շտաբի ներկյացուցիչների խոսակցությունը ՌԴ հետախուզության բարձրաստիճան ներկայացուցիչների եւ պաշտոնյաների հետ: Հատկանշական է, որ այդ խոսակցությունները գաղտանլսվել են այն ժամանակ, երբ հետախուզությունը հավաքել է ապացույցներ Դեմոկրատական կուսակցության սերվերների վրա ռուս ցանցահեննրի հարձակումների մասին: Դոնալդ Թրամփն այդ հրապարակումներն անվանել է նոնսենս եւ ընտրարշավի ժամանակ Հիլարի Քլինթոնի թույլ տված բազմաթիվ սխալների արդարացման փորձ: Ռուսաստանի արտաքին հետխուզության ծառայությունում հայտարարել են, որ չեն պատրաստվում մեկնաբանել «ԶԼՄ-ների անապացույց պնդումները»:
