Իրաքի կառավարությունը, քաղաքական դրդապատճառներից ելնելով, մտադիր է դադարեցնել թուրքական ձեթի ներմուծումը և փոխարենը ձեթ ներկրել Հայաստանից:
Reuters լրատվական գործակալությունը, վկայակոչելով Իրաքի առևտրի նախարարության մամուլի խոսնակին, հաղորդում է, որ Իրաքի առևտրի նախարարի պաշտոնակատար Մոհամեդ Շիա ալ-Սուդանին Հայաստանի դեսպան Կարեն Գրիգորյանի հետ քննարկել է Թուրքիայի փոխարեն Հայաստանից ձեթ գնելու հնարավորությունները: Հանդիպումը տեղի է ունեցել Բաղդադում անցած շաբաթ:
Իրաքում Հայաստանի դեսպանությունից հաստատել են հանդիպման փաստը, սակայն առանց մանրամասնելու, թե ինչ հարցեր են քննարկվել: Իրաքի առևտրի նախարարության մամուլի խոսնակն ասել է, թե պլանավորվել է աստիճանաբար կրճատել ձեթի ներմուծումը Թուրքիայից: Կառավարական ծրագրերով ներմուծվող ձեթն անվճար բաժանվում է բնակչությանը՝ մաս կազմելով պարենային զամբյուղի ապահովմանը, հայտնում է Ազատությունը:
Մամուլի խոսնակն ասել է, թե նախատեսվում է թուրքական ձեթը փոխարինել տեղական արտադրության ձեթով, ինչպես նաև այլ երկրներից ներմուծումներով: Իրաքյան մամուլը, մասնավորապես՝ Բաղդադում հրատարակվող «Ալ-Բայնա ալ-Ջադիդա» թերթը, գրել է, որ այս քայլը բողոք է Իրաքի հյուսիսային շրջան թուրքական զորքեր մտցնելու դեմ:
«Իրաքի կառավարության ծրագրերով ներմուծվող ամբողջ ձեթը տարիներ շարունակ ապահովել է միայն Թուրքիան», - ասել է առևտրի նախարարության խոսնակը, բայց կոնկրետ թվեր չի նշել: Նա ասել է, որ թուրքական ձեթի ներմուծումների ծավալների կրճատումը մասնավոր սեկտորին չի վերաբերում:
Յուրաքանչյուր ամիս Իրաքի բոլոր քաղաքացիներին հատկացվող պարենային օգնության զամբյուղում կա շաքար, ալյուր, ձեթ և բրինձ, քանակությունը կախված է ընտանիքի անդամների թվից:
Իրաքի արդյունաբերության նախարար Մոհամեդ ալ-Դարաջին հինգշաբթի օրը Բաղդադում ասուլիսի ժամանակ հայտարարել է, որ արդյունաբերության նախարարությանը պատկանող հին գործարանները վերանորոգելու, վերագործարկելու միջոցով Իրաքը եկող տարի պետք է ավելացնի սեփական ձեթի արտադրությունը:
