Բնական է, որ ՌԴ արտաքին գործերի նախարար Սերգեյ Լավրովի Երևան կատարած այցի ժամանակ պետք է քննարկվեր նաև Լեռնային Ղարաբաղի հիմնախնդրի կարգավորման հարցը, քանի որ Մոսկվան ԵԱՀԿ Մինսկի խմբի համանախագահ է: Այս մասին լրագրողների հետ զրույցում ասաց ՀՀ արտաքին գործերի փոխնախարար Կարեն Նազարյանը։
«Սա շատ բնական է, որ Սերգեյ Լավրովի այցելության ժամանակ չէր կարող շրջանցվել Լեռնային Ղարաբաղի հակամարտության խաղաղ կարգավորման գործընթացը: Պետք է հաշվի առնելել Ռուսաստանի՝ Մինսկի խմբի համանախագահ երկիր լինելու հանգամանքը»,-ասաց նա՝ հավելով, որ անձամբ հանդիպմանը չի մասնակցել և չի կարող ասել՝ արդյոք քննարկվե՞լ է Լեռնային Ղարաբաղի շուրջ որոշ շրջանների Ադրնբեջանին հանձնելու հարցը: «Ես հանդիպմանը չեմ մասնակցել», - կարճ պատասխանեց փոխնախարարը:
Հիշեցնենք, որ ռուսական «Կոմերսանտ» պարբերականը, անդրադառնալով Լավրովի Երևան այցին և հղում կատարելով սեփական դիվանագիտական աղբյուրներին, հայտնել էր, որ ՌԴ ԱԳՆ ղեկավարի երևանյան հանդիպումների ժամանակ քննարկման հիմնական թեման ղարաբաղյան հակամարտության կարգավորմն է եղել:
Ըստ պարբերականի, հակամարտության լուծման տարբերակներից մեկը հետևյալն է. "Ղարաբաղի շուրջ տարածքները, բացի Լաչինից, որը ցամաքային կապ կապահովի Հայաստանի և ԼՂՀ-ի միջև, հանձնվում են Ադրբեջանին: Բաքուն իր հերթին չի ճանաչում Ղարաբաղի անխակությունը, սակայն, ըստ նախագծի, պարտավորվում է չլուծել հակամարտությունը ռազմական ճանապարհով":
Լրագրողների ճշտող հարցին, թե նման տարբերակ ընդհանարապես քննարկվո՞ւմ է կամ օրակարգում նման կետեր գոյություն ունե՞ն, փոխնախարարը տվեց հերթապահ պատասխան՝ հղում կատարելով Մադրիդյան սկզբունքներին:
«Այդ հարցերին բազմիցս անդրադարձ եղել է, ամենատարբեր առիթներով խոսվել է, որ առհասարակ գոյություն ունի Մինսկի խմբի կողմից արված առաջարկներ, խոսքը վերաբերում է համապարփակ կարգավորմանը և այստեղ առանձնացնել ինչ-որ էլեմենտներ ու քննարկել, անընդունելի է ոչ միայն մեզ համար, այլ նաև համանախագահների: Բայց չեմ կարծում, որ հանդիպմանը նման անդրադարձ եղել է», - ասաց Նազարյանը:
