Ստվերից դուս եկածները. Հայաստանը բացահայտում է հանքերի իրական սեփականատերերին

3411

Կառավարության մարտի 26-ի նիստի որոշմամբ հանքերի իրական սեփականատերերի վերաբերյալ տվյալների մեծ մասը դառնում է հրապարակման ենթակա:


«Հրապարակման ենթակա են դառնում հանքերի իրական սեփականատերերի վերաբերյալ իրավաբանական անձանց պետական ռեգիստրի գործակալություն ներկայացված հայտարարագրում առկա բոլոր տեղեկությունները՝ բացառությամբ ֆիզիկական անձանց անձը հաստատող փաստաթղթի տվյալների, այդ թվում՝ հանրային ծառայության համարանիշի, ինչպես նաև նրանց հաշվառման և բնակության հասցեների մասին տեղեկատվության», - ասված է որոշման մեջ:


Ըստ «ՀՀ ընդերքի մասին օրենսգրքի» պահանջների` իրական սեփականատերերի բացահայտման պարտավորություն ունեցող իրավաբանական անձինք՝ մետաղական օգտակար հանածոյի արդյունահանման և մետաղական օգտակար հանածոյի արդյունահանման նպատակով երկրաբանական ուսումնասիրության իրավունք ունեցող կազմակերպությունները մինչև փետրվարի 20-ը Արդարադատության նախարարության իրավաբանական անձանց պետական ռեգիստր են ներկայացրել իրենց կազմակերպության իրական սեփականատերերի վերաբերյալ հայտարարագիրը:


«Իրական սեփականատերերի վերաբերյալ տեղեկատվության հրապարակումը բխում է ՀՀ Արդյունահանող ճյուղերի թափանցիկության նախաձեռնության (ԱՃԹՆ) իրականացման շրջանակում ստանձնած պարտադիր կատարման ենթակա պարտավորությունից, ինչպես նաև ՀՀ Բաց կառավարման գործընկերության (ԲԿԳ) 4-րդ գործողությունների ծրագրի «Իրական սեփականատերերի բաց, հանրային գրանցամատյանի ներդրում» հանձնառությունից:


ԱՃԹՆ-ն պահանջում է, որ իրական սեփականատերերի վերաբերյալ ամբողջական տվյալներն առանց սահմանափակումների և անվճար հասանելի լինեն հանրությանը:


Ներկայացված իրավական ակտի նախագծի ընդունման արդյունքում կսահմանվի Իրական սեփականատերերի վերաբերյալ հայտարարագրով ներկայացված տվյալների շրջանակը, որն առանց սահմանափակման և պետական տուրքի վճարման հասանելի է հանրությանը Իրավաբանական անձանց պետական ռեգիստրում»,- ասված է հիմնավորման մեջ:


Մինչև օրս Հայաստանի մետաղական հանքերի իրական սեփականատերերի մասին տեղեկատվություն ձեռք բերելը շատ խնդրահարույց էր: Այդ հանքերի սեփականատեր ընկերությունները սովորաբար գրանցված էին տարբեր օֆշորային գոտիներում: Ըստ այդմ հանքերի իրական սեփականատերերը գտնվել են ստվերում: Այդ ընկերություններն օրենսդրությամբ պարտավորված չէին բացահայտել իրենց սեփականատերերի մասին տեղեկատվությունը:

Տպել

Թեմայի այլ նորություններ
Загрузка...