Ահազանգ Էջմիածնից. եզակի մասունք Սուրբ Գեղարդի մի մասը կտրվել և նվիրվել է ռուս քաղաքապետի
Մայր Աթոռի Դիվանատանը լարված իրավիճակ է: Ցուցարարները ներխուժել են Դիվանատուն և պահանջում են Ամենայն Հայոց Կաթողիկոսի հրաժարականը:
Ինչպես հաղորդում է tert.am-ը, վերջերս Էջմիածին քաղաքում տեղի ունեցած բողոքի ակցիայի ժամանակ Կորյուն աբեղա Առաքելյանն ասաց, որ գանձատան թանկարժեք իրերն ու սուրբ մասունքները վաճառվել են:
Ցուցարարներն այսօր ևս նման պնդումներ արեցին և ասացին, որ Ամենայն Հայոց Կաթողիկոսը պետք է հրաժարական տա:
Դիվանատան շենքում են նաև ոստիկանության ծառայողները, իսկ ցուցարարները չեն լքում շենքը: Նրանք հոգևորականներից պահանջեցին, որ իրենց ցույց տան Սուրբ Գեղարդը:
Ցուցարարները պնդում էին, որ այն վաճառվել է, իսկ Արշակ Սրբազանն ասաց, որ չի վաճառվել. «Գեղարդը չի վաճառվել, նրա մի մասը կտրվել և նվիրվել է ռուս քաղաքապետի»:
Ցուցարարները նույն հարցն ուղղեցին այլ հոգևորականների՝ արդյոք տեղյա՞կ են, որ Սուրբ Գեղարդից մեկ կտոր պակասում է:
Հոգևորականները պատասխանեցին, որ իրենք տեղյակ չեն:
Այժմ էլ ցուցարարները հրավիրում են իրավապահների ուշադրությունը, նշելով, որ պետք է պարզվի, թե արդյոք նվիրվե՞լ է, թե՞ վաճառվել:
Ցուցարարները հայտնեցին, որ հոգևորականներն իրենց նկատմամբ բռնություն են կիրառել, ականատեսներ էլ կան:
Հոգևորականների հորդորներին, որ ցածր խոսեն, ցուցարարները գոռացին. «Գարեգին, հեռացիր»:
Նշենք, որ աշխարհում Սուրբ Գեղարդ կամ Լոնգինի Գեղարդ անունը կրող հինգ քրիստոնեական մասունք կա, սակայն դրանցից միայն մեկն է բնօրինակը, որը դարեր շարունակ պահվում է Մայր Աթոռ Սուրբ Էջմիածնում, մյուսները դրա պատճեններն են:
Ավանդության համաձայն` հինգ սուրբ գեղարդներից միայն մեկով է հռոմեացի լեգեոներ Լոնգինը խոցել Հիսուս Քրիստոսի կողը։ Այն պահվում է Մայր Աթոռ Սուրբ Էջմիածնի թանգարանում, մյուս գեղարդները ցրված են աշխարհով մեկ։
