Լեռնային Ղարաբաղի հետ ռազմական փոխօգնության պայմանագիր կնքելու անհրաժեշտություն այս պահին չկա: Այս մասին Ազգային ժողովում հայտարարեց խորհրդարանական Պաշտպանության և անվտանգության հարցերի մշտական հաննաժողովի նախագահի թեկնածու Անդրանիկ Քոչարյանը: Ըստ նրա, Հայաստանը պետք է լինի Արցախի անվտանգության երաշխավորը, և դրանով ամեն ինչ ասված է. «Այդ հարաբերություններով մենք միայն հաջողություններ ենք ունեցել, չենք ունեցել խնդիրներ: Չեմ ցանկանում, որ միջազգային հարթակում ստեղծենք խնդիր այս պահին, որովհետև մենք մեր ներքին խնդիրները կարողանում ենք լուծել, եթե խառնակիչները շատ չխառնակեն», - շեշտեց հանձնաժողովի նախագահի թեկնածուն: Հիշեցնենք, 2016 թվականին ապրիլյան պատերազմից հետո ՀՀ նախագահ Սերժ Սարգսյանը ԱԳՆ-ին հանձնարարել էր Լեռնային Ղարաբաղի հետ ռազմական փոխօգնության պայմանագիր կնքել: Սակայն արդեն մեկ ամիս անց՝ մայիսին, ԱԳ նախարար Էդվարդ Նալբանդյանը հայտարարեց, որ թեև Հայաստանի և Լեռնային Ղարաբաղի միջև ռազմական փոխօգնության պայմանագիրը գտնվում է մշակման փուլում, բայց դրա հետ կապված հաջորդ քայլերը կախված կլինեն ապագա զարգացումներից և համապատասխան գործոններից:
