2022 թ. հունվարի 6-ին ընդունված ՀԱՊԿ Հավաքական անվտանգության խորհրդի որոշման համաձայն, իրավիճակի կայունացման եւ կարգավորման համար սահմանափակ ժամանակահատվածով Ղազախստանի Հանրապետություն են ուղարկվել Հավաքական անվտանգության պայմանագրի կազմակերպության Հավաքական խաղաղապահ ուժեր: Այս մասին ասվում է այսօր՝ հունվարի 6-ին, ՀԱՊԿ պաշտոնական կայքում հրապարակված հայտարարության մեջ։ Նշվում է, որ այդ ուժերի կազմում ընդգրկվել են Հայաստանի Հանրապետության, Բելառուսի Հանրապետության, Ղրղզստանի Հանրապետության, Ռուսաստանի Դաշնության և Տաջիկստանի Հանրապետության զինված ուժերի ստորաբաժանումները: «ՀԱՊԿ Հավաքական խաղաղապահ ուժերի հիմնական խնդիրները կլինեն պետական եւ ռազմական կարեւոր օբյեկտների պահպանությունը, իրադրության կայունացման եւ իրավական դաշտ վերադառնալու գործում Ղազախստանի Հանրապետության իրավապահ ուժերին աջակցության ցուցաբերումը: Ռուսաստանի Դաշնությունից ՀԱՊԿ Հավաքական խաղաղապահ ուժերի կազմի մեջ են մտել օդադեսանտային զորքերի ստորաբաժանումներն ու զորամասերը: Ներկայումս Ռուսաստանի օդատիեզերական ուժերի ռազմատրանսպորտային ավիացիայի ինքնաթիռներով իրականացվում է խաղաղապահ զորակազմի ռուսական մասի տեղափոխումը Ղազախստանի Հանրապետության տարածք: «Այս պահի դրությամբ, առաջապահ ստորաբաժանումները նրա կազմից արդեն ձեռնամուխ են եղել առաջադրված խնդիրների կատարմանը», - ասված է հաղորդագրության մեջ:
