Եթե Հայաստան-Թուրքիա հարաբերությունների կարգավորման գործընացն առաջ է գնում, ապա հայկական կողմը հերթական անգամ զիջելու է: Այդ մասին ֆեյսբուքյան իր էջում անդրադառնալով հայ-թուրքական հարաբերությունների կարգավորման համար հատուկ բանագնացներ նշանակելու մասին Մևլութ Չավուշօղլուի հայտարարությանը՝ գրել է թուրքագետ Վարուժան Գեղամյանը:
Թուրքիայի արտգործնախարար Մևլութ Չավուշօղլուն երեկ պաշտոնապես հայտարարել է, որ Հայաստանը և Թուրքիան սկսում են հարաբերությունների կարգավորման գործընթաց, որն իրականացվելու է հատուկ նշանակված բանագնացների միջոցով։ Հայաստանի ԱԳՆ-ն դրական է գնահատել Թուրքիայի ԱԳ նախարարի` հարաբերությունների կարգավորման նպատակով հատուկ ներկայացուցիչ նշանակելու մասին հայտարարությունը, և հաստատել, որ հայկական կողմը ևս երկխոսության համար հատուկ ներկայացուցիչ կնշանակի:
Վարուժան Գեղամյանը կարծում է, որ ինչպես նախկինում, այնպես էլ հիմա Թուրքիան մի քանի նախապայմաններ է առաջադրել Հայաստանի հետ դիվանագիտական հարաբերություններ հաստատելու համար։ «Ցեղասպանության միջազգային ճանաչման պայքարից հրաժարումից մինչև Ադրբեջանի տարածքային ամբողջականության ճանաչում և Սյունիքով «Թյուրքական միջանցքի» տրամադրում։ Վստահ կարելի է պնդել, որ Թուրքիան չի հրաժարվել այս նախապայմաններից», - հիշեցնում է փորձագետն ու նկատում, որ Հայաստանի վարչակարգն է համաձայնել դրանց։
Եթե գործընթացն առաջ է գնում, ուրեմն նրա խարծիքով, Հայաստանը հերթական անգամ զիջելել է։ «Արձանագրենք, որ հերթական անգամ այս ամենն ընթանում է գաղտնի և հայ հասարակության մասնագիտացված շրջանակների հետ առանց որևէ քննարկման։ Ավելին, եթե նայեք, թե Թուրքիան և Ադրբեջանը միջազգային հարթակներում ինչ գործունեություն են ծավալում, ապա կտեսնենք, որ նոր նախապայմանների համար հող է նախապատրաստվում», - նշել է նա։
Այս գործընթացով, նշում է փորձագետը, մեկնարկում է հայկական պետականության թուլացման և «թուրքացման հերթական արարը»։ «Այժմ փաշինյանական վարչակարգը ունի լուծելու կարևոր խնդիր. անհրաժեշտ է ՀՀ բնակչությանը գեղեցիկ փաթեթավորմամբ մատուցել հայ-թուրքական եղբայրության գաղափարը։ Սա է պատճառը, որ վերջին ամիսներին և հատկապես շաբաթներին Հայաստանում ակտիվ գործունեություն են ծավալել զանազան հասարակական գործիչներ, կեղծ գիտնականներ ու փորձագետներ, ովքեր ամենաօրյա ռեժիմով քարոզում են Արցախից ու Ցեղասպանությունից հրաժարում և Թուրքիայի հետ «առևտուր անելու անհրաժեշտություն»՝ մոռանալով հայկական ազգային շահերը։ Ավելին, դրանով նրանք մեծ վնաս են հասցնում տարածաշրջանային մեր այն հնարավոր դաշնակիցներին, որոնք ևս կանգնած են թուրքական ծավալապաշտության առջև։ Առաջիկա շրջանում այս բացահայտ քարոզի մասշտաբները էլ ավելի են մեծանալու», - նշել է նա։
Միաժամանակ Թուրքիան և Ադրբեջանը, կարծում է թուրքագետը, արևելյան քաղցրախոսությանը զուգահեռ, շարունակելու են «թուլացնել մեր պետությունը, որովհետև նրանց վերջնական նպատակը ոչ թե Հայաստանի հետ հարաբերություններ ունենալն է, այլ այս տարածաշրջանում հայկական անկախ քաղաքական միավորի վերջնական վերացումը»։ ««Խաղաղ գոյակցության» մնացած սցենարները պատրանքն են կամ գիտակցված թուրքական քարոզ», - նշում է նա։
«Այս տարվա ապրիլին Թուրքիայի նախագահ Էրդողանը Հայաստանին այսպիսիս «դրական» ազդակ էր ուղարկել. «Այնուամենայնիվ, մյուս կողմից գոյություն ունի այսպիսի ճշմարտություն. ոչ շատ վաղ, մեկ դար առաջ այն տարածքում, որտեղ այսօր գտնվում է Հայաստան պետությունը, բնակչության 80 տոկոսից ավելին կազմում էին մուսուլմանները։ Սա շատ կարևոր է»», - հիշեցրել է Գեղամյանը։
