ԱԺ-ում բուռն քննարկում էր տեղի ունեցել ՔԿ գործունեության շուրջ

Պատգամավոր Ագնեսա Խամոյանը (խմբակցություն «Հայաստան») բյուջեի քննարկման ընթացքում խիստ քննադատեց Քննչական կոմիտեին՝ մեղադրելով պետական ռեկետի մեջ։

Նրա խոսքով՝ հարկային մարմինների աշխատակիցները տնտեսվարողների մոտ «քաղաքավարի ներխուժելով» առաջարկում են վճարել որոշակի գումար՝ սպառնալով, որ հակառակ դեպքում գործով կզբաղվեն քննիչները։ «Քննիչներն էլ խորհուրդ են տալիս գումար փոխանցել ինչ-որ հաշվեհամարի՝ խոստանալով, որ այն կամ կվերադարձվի, կամ՝ ոչ, իսկ եթե ոչ՝ բիզնեսմենին կկալանավորեն», — նշեց պատգամավորը։

Խամոյանը նաև անդրադարձավ քաղբանտարկյալների թեմային՝ հետաքրքրվելով, թե երբ Սամվել Կարապետյանի գործը կհասնի դատարան և ինչն է ձգձգման պատճառը։ Նա հիշեցրեց, որ գործընթացում արձանագրվել են բազմաթիվ գաղտնալսումներ և հարցրեց՝ «չէ՞ որ սա նույնպես պետք է դառնա քննության առարկա»։

ՔԿ նախագահ Արթուր Պողոսյանը, արձագանքելով, ասաց, որ «պետական ռեկետ» ձևակերպման հետ համաձայն չէ։ Նրա խոսքով՝ 10 միլիոն դրամը հազիվ գերազանցող գործերով վարույթ չեն սկսում։ «Հասկանում եմ, որ քննչական գործողությունները երբեմն խոչընդոտում են բիզնեսի աշխատանքին, ինչը դժգոհություններ է առաջացնում», — ասաց Պողոսյանը։

Խոսելով Սամվել Կարապետյանի գործի մասին՝ նա նշեց, որ այն ծավալուն քննություն է, որը ներառում է փողերի լվացման, խարդախության և հարկերից խուսափելու դրվագներ։ Պողոսյանի խոսքով՝ ՔԿ-ում այժմ 811 քննիչ է աշխատում, 203 հաստիք թափուր է, իսկ կին ծառայողների թիվը 158 է։

Խամոյանը, արձանագրելով, որ Պողոսյանը փաստացի չհերքեց բիզնեսի նկատմամբ ճնշումների փաստը, հավելեց, որ ՔԿ-ում կալանքը վերածվել է «ֆետիշի»։ Նա բացահայտ հարց ուղղեց.
«Ի՞նչ է արել ՔՊ-ական պատգամավորի զոքանչը, որ նրան կալանավորել եք՝ Վարդան Ղուկասյանի ակցիային մասնակցելու համար»։

Պատգամավորը նաև հիշեցրեց, որ Գյումրիում անգամ անչափահաս է կալանավորվել՝ իշխանությունների նկատմամբ անհանդուրժող վերաբերմունք ցուցաբերելու համար։