Իրանը մտադիր չէ սառեցնել էներգակիրների արդյունահանումն ու արտահանումը
Իրանը մտադիր չէ սառեցնել սեփական էներգակիրների արդյունահանումը, քանի որ Թեհրանը ժամանակին չի մասնակցել համաշխարհային նավթային շուկան դիսբալանսի հասցրած գործընթացներին: Այս մասին հայտնել է Իրանի նավթի նախարար Բիժան Նամդար Զանգանեն, հայտնում է ՏԱՍՍ գործակալությունը՝ հղում տալով Shana-ին:
«Իրանը ոչ մի դերակատարում չի ունեցել շուկայի դիսբալանսի հարցում, և պետք չէ սպասել, որ Իսլամական Հանրապետությունն ինքն իր նկատմամբ պատժամիջոցներ կկիրառի և բոյկոտ կհայտարարի», - ասել է Իրանի նավթի նախարարը՝ միեւնույն ժամանակ ողջունելով Նավթ արդյունահանող երկրների կազմակերպության՝ ՕՊԵԿ-ի ու ՌԴ-ի մտադրությունը սառեցնել նավթի արդյունահանումը:
«ՕՊԵԿ-ի ու ՌԴ-ի միասնական ջանքերն առաջին անգամ ցուցադրում են լուրջ և կառուցողական գործընկերություն: Սակայն միեւնույն ժամանակ պետք է նշեմ, որ Իրանը ոչ մի պարագայում չի սառացնելու իր արդյունահանումը եւ մտադիր է վերականգնել իր դիրքերն այդ շուկայում», - եզրափակել է նա:
Այս օրերին Քաթարի մայրաքաղաք Դոհայում նավթ արտադրող երկրների ներկայացուցիչների միջեւ ընթանում են բանակցություններ «սեւ ոսկու» արդյունահանումը 2016 թվականի մակարդակին սառեցնելու վերաբերյալ:
Սաուդյան Արաբիան դեռ ամիսներ առաջ էր հայտարարել, որ կհամաձայնի նավթի արդյունահանման սառեցմանը, եթե մյուս արտադրողները, այդ թվում Իրանը գնան այդ քայլին: Սակայն Թեհրանը, որը պատժամիջոցների չեղարկումից հետո, այս տարի է ամբողջությամբ վերադարձել նավթի համաշխարհային շուկա, չի պատրաստվում սահմանափակել արդյունահանման ծավալները քանի դեռ դրանք չեն հասել օրեկան չորս մլն բարելի:
ՕՊԵԿ-ի տվյալներով, այժմ Իրանի օրեկան արդյունահանումը կազմում է 3,29 մլն բարել, սակայն Թեհրանը հայտարարում է, որ արդեն մեկ օրվա մեջ արդյունահանում է 3,5 մլն բարել նավթ, հայտնում է РБК-ն:
Վերլուծաբանների կարծիքով, անկախ նրանից, թե ինչպես կավարտվեն Դոհայում բանակցությունները, նավթի արդյունահանման ծավալների փոփոխություն տեղի չի ունենա: Նման կարծիքի են հատկապես Bloomberg-ի կողմից հարցված փորձագետների մեծ մասը: Նման տեսակետ էր արտահայտված նաև ապրիլի 14-ին լույս տեսած Միջազգային տնտեսական գործակալության նավթային շուկայի հեռանկարների վերաբերյալ զեկույցում:
Միջազգային տնտեսական գործակալության վերլուծաբան Նիլ Ատկինսոնի խոսքով, որը մեջբերում է Reuters-ը, Դոհայում բանակցություններին մասնակից պետությունները, բացառությամբ Սաուդյան Արաբիայի, ուղղակի ի վիճակի չեն էականորեն ավելացնել նավթի արդյունահանման ծավալները:
