ԲՀԿ-ական թեկնածուն կհրաժարվի «Միայնակ գայլի» քաղաքական պայքարի օգտին

«Սասնա Ծռեր» զինված խմբի անդամ, ազատամարտիկ Արայիկ Խանդոյանը, ով մեղադրվում է Խորենացի փողոցում զանգվածային անկարգություններ կատարելու մեջ և այժմ գտնվում է մեկուսարանում, հանդես էր եկել հայտարարությամբ, որով տեղեկացրել էր, որ ցանկություն ունի առաջադրվելու սեպտեմբերի 18-ին Արագածոտնի մարզի Ծաղկահովիտ համայնքում կայանալիք համայնքապետի ընտրություններին։

VERELQ-ի հետ զրույցում «Բարգավաճ Հայաստան» կուսակցության մամուլի խոսնակ Վանիկ Էլիզբարյանը տեղեկացրեց, որ Ծաղկահովիտի համայնքապետի ընտրություններին մասնակցելու համար առաջադրվել է նաև ԲՀԿ անդամ, Ծաղկահովիտի ԲՀԿ կառույցի պատասխանատու Աշոտ Հակոբյանը։

«Վերջինս, սակայն, տեղեկացրել է, որ եթե Արայիկ Խանդոյանը առաջադրվի Ծաղկահովիտում կայանալիք համայնքապետի ընտրություններում, ապա ինքը իր թեկնածությունը կհանի»,- փոխանցեց կուսակցության խոսնակը։

Նշենք, որ առաջադրումների ժամկետն ավարտվում է այսօր՝ օգոստոսի 19-ին, ժամը 18.00-ին։

Նշենք նաև, որ Արայիկ Խանդոյանն իր պաշտպանի միջոցով երեկ բանտից նաև հայտարարել է, որ ինքը ցանկանում է իր թեկնածությունն առաջադրել իրենց համայնքի ՏԻՄ ընտրություններին, սակայն քրեակատարողական հիմնարկի ղեկավարությունը խոչընդոտում է։