ԱՄՆ ռազմածովային ուժերը հայտարարել են, որ իրանական նավը լազեր է ուղղել Հորմուզի նեղուցում ԱՄՆ-ի նավերն ուղեկցող ամերիկյան ուղղաթիռի վրա՝ նշելով, որ այդ քայլը վտանգ է ներկայացնում նավագնացության համար: Դեպքը տեղի է ունեցել հունիսի 13-ին, երբ ամերիկյան նավերի խումբը եղել է Հորմուզի նեղուցի միջազգային ջրերում: Ինչպես հայտարարել է ԱՄՆ ռազմածովային ուժերի ներկայացուցիչ Բիլ Ուրբանը, իրանական նավը հավասարվել է ամերիկյան նավերին և լույս ուղղել դրանցից մեկի վրա: «Դրանից կարճ ժամանակ անց իրանական նավը լազեր է ուղղել CH-53E ուղղաթիռի վրա, որն ուղեկցում էր նավերի խումբը»,- հայտարարել է նա: Նրա խոսքով՝ դրանից հետո իրանական նավը լուսավորել է ևս մեկ ամերիկյան նավ՝ մոտենալով 800 մետրի վրա: Ինչպես ասվում է ամերիկյան ռազմածովային ուժերի հայտարարությունում, «գիշերային ժամերին լազերով ուղղաթիռների լուսավորումը վտանգավոր է, քանի որ վտանգ է ստեղծում, որը կարող է ապակողմնորոշել օդաչուներին»:
