Այսօր քաղաքական դաշտում մեկ անձ է մնացել, ով ունի քաղաքական մեծ թիմ և մասնակցել է նորանկախ Հայաստանի ամբողջական պատմությանը, դա Սերժ Սարգսյանն է, այսինքն՝ երկրի ղեկավարումը պետք է տանի Սերժ Սարգսյանը:Այս մասին Tert.am-ի հարցին ի պատասխան, թե ո՞վ է լինելու 2018թ-ին ՀՀ վարչապետը, ասել է ԱԺ նախկին նախագահ, ՀՀԿ–ական պատգամավոր Գալուստ Սահակյանը: «Երբ այսպես ասում եմ, մտածում են՝ մենք ներսում խոսել ենք և որոշել ենք, որ արդեն որոշում կա, բայց սա իմ կարծիքն է: Ինչո՞ւ եմ ասում, որովհետև էլի շատ մարդիկ կան, որ 88-ից սկսած քաղաքականության մեջ են եղել, բայց նրանցից որևէ մեկն այդքան մեծ քաղաքական թիմ չունի և ծրագիրը իրագործելու կարողության որակները շատ ցածր են հետագայի համար: Դրա համար էլ ասում եմ, մեր ազգը պետք է ընդունի, որ առաջիկայում նորից Սերժ Սարգսյանը պետք է ղեկավարի երկիրը»,- ասաց Սահակյանը։ Պատգամավորի կարծիքով՝ վարչապետ Կարեն Կարապետյանը, այդուհանդերձ, մեծ դերակատարում կունենա Կառավարության առաջին անգամ հնգամյա նման մանրամասն ծրագիրն իրագործման հարցում։ Գալուստ Սահակյանը շարունակել է, թե իր այս պնդումից հետո իրեն հարցնում են, թե ինչպես պետք է Սերժ Սարգսյանը ղեկավարի: «Պատասխանում եմ՝ դա էլ դուք գտեք պատասխանը, թե ինչպես պետք է ղեկավարի, ոնց որ քաղաքական դաշտը փա՞կ է և որևէ անհրաժեշտ գործոն չի կարող լինել, որ դա հենց այդպես լինի: Հիմա մտածում եք ո՞նց, ԱԺ նախագահ չի կարող դառնալ, վարչապետ եթե դառնա, ասում են վարչապետն էլ երկրի տերն է, ես էլ ասում եմ, ոչ երկրի տերը ԱԺ-ն է, որովհետև մենք անցել ենք խորհրդարանական կառավարման ձևին և մնում է մտածել, թե ինչպես պետք է լինի»,-ասաց նա: Ավելին, իր բազմամյա քաղաքական փորձից ելնելով Գալուստ Սահակյանը համոզվել է, որ ինչի մասին ինքը խոսում է, «դա բացարձակ ճշմարտություն է»: «Առավել ևս ասեմ, որ դեռևս չի եղել որևէ դեպք, իսկ ես քաղաքականության մեջ եմ 88թ-ից սկսած, որ հանկարծ ես ինչ-որ բան մտածեմ, ու դա այդպես չլինի, այսինքն՝ բավականին լուրջ կշիռ ունեմ»,- ասաց նա: Լրագրողների հարցին, թե կարելի՞ է ենթադրել, որ ինքը կլինի Սերժ Սարգսյանին համոզողների թվում, որպեսզի վերջինս շարունակի ղեկավարել, Գալուստ Սահակյանը պատասխանեց, թե ինքը չի համոզում, այլ ընդամենն ասում է: «Ես որևէ մեկին չեմ համոզում, ասում եմ երբեմն-երբեմն և դա համոզիչ է դառնում բոլորի համար և ես չեմ գտնում, որ ես քաղաքական այն ուժի ներկայացուցիչն եմ, որ պետք է կարողություններ գտնի մարդկանց համոզելու. իրականությունն այնպիսին է, երբ ասում ես՝ մարդիկ կարողանում են երևույթը ճիշտ դատել»,- ասաց նա: Լրագրողների դիտարկմանը, թե մատնանշելով Սերժ Սարգսյանի անցած ճանապարհը, արդյոք չպե՞տք է հաշվի առնեն նաև այն, որ Կարեն Կարապետյանն էլ վատ վարկանիշ չունի, ՀՀԿ պատգամավորը պատասխանել է. «Քաղաքական շատ մեծ գործիչներ կան, որոնք ճանապարհ են անցել, բայց, ըստ էության, ամենամեծ քաղաքական թիմը և պետության անկախության ամբողջական ճանապարհն անցել է Սերժ Սարգսյանը: Այսօր քաղաքական մեծ թիմ ունեցող չկա և ես չեմ կարծում, որ Կարեն Կարապետյանը չի ցանկանալու, որ Սերժ Սարգսյանն իր գործունեությունն առաջ տանի: Իհարկե, շատ լավ է, ես ուրախանում եմ, և մենք էլ ամեն ինչ արեցինք, որ ժողովրդի կողմից ընդունվի Կարեն Կարապետյանը, որպես նոր ոգու տեր վարչապետ և կարողանա այդ գործերն առաջ տանի: Պետք է հասկանանք՝ պետությունն ինչ բան է, ով է ստեղծել, վերջին հաշվով երբ մարդիկ ստեղծել են, բավական շատ ընկերներ ու մարդիկ են կորցրել, որ կարողացել են պետություն ստեղծել և դա մինչև վերջ պետք է տանել»,- ասաց նա: Նախկին ԱԺ նախագահն ընդգծել է, թե իհարկե Կարեն Կարապետյանն էլ կարող է լինել վարչապետ, ինչ-որ մեկ ուրիշն էլ: Ինչ վերաբերում է Րաֆֆի Հովհաննիսյանի հայտարարությանը, որ եթե Սերժ Սարգսյանը մնա երկրի իշխանության ղեկին 2018թ-ից հետո, ապա թավշյա հեղափոխություն կանեն, Գալուստ Սահակյանը նշել է, թե արտաքին քաղաքականության դաշտում նման բաներ տեսել են, բայց միևնույնն է՝ հայերը նման խնդիր չունեն: «Մեր մոտ թավշյա հեղափոխություններ կամ ընդհանրապես հեղափոխություն չի կարող լինել, որովհետև մեր ժողովրդի մոտեցումները խիստ պահպանողական են, տրամաբանական իրենց արժեքների նկատմամբ»,- եզրափակել է նա: