Հայերն աշխարհում առաջինն են ընդունել քրիստոնեությունը՝ որպես պետական կրոն եւ հալածանքների են ենթարկվել միայն այն պատճառով, որ քրիստոնյա են։ Այս մասին հայտարարել է Հռոմի Պապ Ֆրանցիսկոս Առաջինը սեպտեմբերի 7-ին Հայ կաթողիկե եկեղեցու նորընտիր պատրիարք Գրիգոր Պիեռ Գաբրոյանի հետ անցկացրած համատեղ պատարագից հետո։ «Հայ ժողովրդին հալածում էին, վտարում հայրենի հողից՝ անօգնական թողնելով անապատում»,- նշել է պոնտիֆիկոսը։ Ողջունելով հայ պատրիարքին, հոգեւորականներին եւ հավատացյալ հայ ժողովրդին՝ Հռոմի Պապը նշել է, որ ուզում է հիշել այդ հալածանքները, հիշել բոլոր այն մարդկանց, ովքեր խոշտանգումներից, քաղցից եւ ցրտից մահացել են միայն այն պատճառով, որ քրիստոնյա են։ Աղոթքի ժամանակ պոնտիֆիկոսը անդրադարձել է նաեւ մեր օրերում քրիստոնյաների հալածանքներին՝ նշելով, որ դա տեղի է ունենում աշխարհի ուժեղների թողտվությամբ:
