Հայաստանի Հանրապետության հակակոռուպցիոն կոմիտեի վարույթում Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի ունեցվածքին առնչվող որևէ գործ չկա։ Այս մասին այսօր լրագրողների հետ զրույցում հայտարարեց կոմիտեի նախագահ Արթուր Նահապետյանը։ Արձագանքելով ԶԼՄ ներկայացուցիչների հարցին, թե արդյոք իրավապահ մարմնի տիրույթում առկա՞ է Վեհափառ Հայրապետի գույքին կամ ունեցվածքին վերաբերող որևէ քննվող գործ, Նահապետյանը տվեց միանշանակ պատասխան: «Ո՛չ, Հակակոռուպցիոն կոմիտեում նման գործ չկա», — ընդգծեց կառույցի ղեկավարը։ Հարկ է նշել, որ վերջին շրջանում հանրային և լրատվական դաշտում պարբերաբար քննարկվում էին բարձրաստիճան հոգևորականների ունեցվածքի օրինականությանն առնչվող հարցեր, սակայն կոմիտեի նախագահի այս հայտարարությունը հերքում է այդ կապակցությամբ որևէ պաշտոնական իրավական գործընթացի առկայությունը տվյալ պահին։
