«Իսլամական պետության» գրոհայինները հունիսի 21-ին պայթեցրել են Մոսուլի Ան Նուրի մզկիթը, որը համարվում է Իրաքի գլխավոր ճարտարապետական և կրոնական հուշարձաններից մեկը: Այդ մասին հայտնել են Իրաքի և ԱՄՆ զինվորականները:Պայթյունը որոտացել է, երբ զորքերը մոտենում էին մզկիթին:Զինվորականները հերքում են ԻՊ քարոզիչների այն հայտարարությունը, թե կոալիցիայի ինքնաթիռներն են ոչնչացրել մզկիթը, որտեղ ջիհադականների առաջնորդ Աբու Բաքր ալ Բաղդադին 2014-ին հռչակեց «խալիֆաթի» ստեղծումը, երբ նրա գլխավորած ուժերը հսկողություն հաստատեցին Իրաքի և Սիրիայի զգալի տարածքներում:Մոսուլի գրոհի հրամանատար գեներալ Աբդուլամիր Յարալլը մզկիթի պայթեցումը համարել է «պատմական հանցագործություն», հայտնում է «Ամերիկայի ձայնի» ռուսական ծառայությունը:
