Սիրիայի արտաքին գործերի նախարարությունը պատասխանել է Թուրքիայի նախագահ Ռեջեփ Թայիփ Էրդողանի հայտարարությանը, որով նա «ահաբեկիչ» էր անվանել Սիրիայի նախագահ Բաշար ալ Ասադին: Էրդողանը, մասնավորապես, ասել էր, որ Ասադը մեղավոր է իր երկրում մեկ միլիոնից ավելի մարդու մահվան համար և որ դրա պատճառով Թուրքիան չի կարող նրա կողքին լինել: «Նա միանշանակ ահաբեկիչ է», - ասել էր Թուրքիայի նախագահը: Սիրիայի ԱԳՆ-ն ի պատասխան Էրդողանի հայտարարության տարածած հաղորդագրության մեջ մեղադրել է Էրդողանին ահաբեկչական խմբավորումներին մեծ աջակցություն ցույց տալու համար: Ավելին՝ Սիրիայի ԱԳՆ-ն նշել է, որ Էրդողանի այդ քաղաքականությունը խնդիրների աղբյուր է դարձել ոչ միայն Դամասկոսի, այլև հենց Անկարայի համար: Հաղորդագրության մեջ շեշտվում է, որ նման հայտարարություններով Թուրքիայի նախագահը փորձում է ապակողմնորոշել Թուրքիայի ժողովրդին և կոծկել Սիրիայի ժողովրդի դեմ իր գործած հանցանքները:
