Ես երբևէ չեմ լսել հիմնավորումներ, թե ինչով է վնաս ՀՀ-ին ԵԱՏՄ-ին միանալը. նախարար

Ես երբևէ չեմ լսել հիմնավորումներ, թե ինչով է վնաս ՀՀ-ին ԵԱՏՄ-ին միանալը, սակայն կարող եմ բազմաթիվ փաստեր բերել, որոնք խոսում են հօգուտ այդ անդամակցության: Այս մասին հեռուսատեթերում հայտարարել է ՀՀ տնտեսական զարգացման և ներդրումների նախարար Սուրեն Կարայանը:

«ԵԱՏՄ-ին անդամակցությունը հնարավորություն է, որպեսզի Հայաստանը մուտք գործի 180 միլիոնանոց շուկա: Եվ այս մի քանի տարվա պատմությունը ցույց տվեց, որ մեր արտահանումը մեծ աստիճանով աճեց դեպի Եվրասիական տնտեսական շուկա: Այդպես, եթե չեմ սխալվում, անցած տարի արտահանումը դեպի եվրասիական շուկաներ աճել է 60 տոկոսով, իսկ այս տարվա 4 ամսվա կտրվածքով՝ 40 տոկոսով»,- ասել է նախարարը:

Ըստ նախարարի՝ Հայաստանը մրցունակ է և արտահանման ծավալների 70-80 տոկոսը հենց դեպի Եվրասիական տնտեսական միություն է: Հայաստանը մրցունակ է, շարունակել է նա, որովհետև բոլոր այն երկրները, որ թեթև արդյունաբերության արտադրանք էին ներմուծում Ռուսաստան, ներմուծման ժամանակ վճարում են մաքսային տուրքեր, իսկ Հայաստանը մաքսատուրք չի վճարում: Բացի այդ կրճատված են բոլոր այն ծախսերն ու խոչընդոտները, որ կապված էին Հայաստանից դեպի ռուսաստանյան կամ ԵԱՏՄ այլ շուկաներ ներմուծման հետ:

«Թեթև արդյունաբերությունը դեպի ԵԱՏՄ զարգանում է: Զարգանում է նաև կաշվի և կաշվե ապրանքների արտադրությունը: Կաշվի, կոշիկի արտադրություն ինչ-որ չափով մենք էլ ունենք: Բայց օժանդակ քայլեր ենք կիրառում, որպեսզի դրանք, ինչպես նաև թեթև արդյունաբերության արտադրությունները կարողանան ավելի ազատ և արդյունավետ գործել: Արդեն ունենք լուրջ պատվերներ, լուրջ ներդրողներ, որոնք պատրաստ են ներկայումս արտադրություններ հիմնել կաշվի և կոշիկի արտադրանքի մասով»,- թվարկել է Կարայանը: