ՀԱՊԿ անդամ պետությունները շարունակում են ինտենսիվ խորհրդատվությունները ՀԱՊԿ գլխավոր քարտուղար Յուրի Խաչատուրովի փոխարինման վերաբերյալ, որոշումը պետք է ընդունելի լինի բոլոր կողմերի համար: Այդ մասին RIA Novosti-ին ասել է Ղազախստանի ԱԳՆ ղեկավար Քայրաթ Աբդրախմանովը: «Վստահ եմ, որ որևէ բացասական հետևանքներ այդ իրավիճակը ՀԱՊԿ լիարժեք գործունեության վրա չի ունենա: Ընթանում է խորհրդատվությունների, բանակցությունների գործընթացը, ինչը բնորոշ է ցանկացած կազմակերպությանը քարտուղարի փոխարինման ժամանակ»,-ասել է նա: Ավելի վաղ Հայաստանը Հավաքական անվտանգության պայմանագրի կազմակերպության գործընկեր պետություններին առաջարկել էր սկսել Գլխավոր քարտուղարի փոխարինման գործընթաց: Հիշեցնենք, որ Յուրի Խաչատուրովին մեղադրանք է առաջադրվել ՀՀ Քրեական օրենսգրքի 300.1 հոդվածի 1-ին մասով՝ այն բանի համար, որ նա այլ անձանց հետ նախնական համաձայնությամբ 2008 թվականի մարտի 1-ին տապալել է Հայաստանի Հանրապետության սահմանադրական կարգը:
