Հոկտեմբերի 31-ին՝ ժամը 13:00-ից 20:00-ը, «Էլիտ Պլազա» բիզնես կենտրոնում (հասցեն՝ Խորենացու 15) տեղի կունենա Artsakh Career Expo-ն՝ աշխատանքային տոնավաճառ արցախցիների համար։ Այս մասին տեղեկանում ենք աշխատանքային տոնավաճառի կազմակերպիչների տարածած մամուլի հաղորդագրությունից։ «Նպատակը բռնի տեղահանված մեր հայրենակիցներին աջակցելն է զբաղվածության, սոցիալական, կրթական և աշխատանքային կյանքին ինտեգրվելու հարցերում», - ասված է հաղորդագրությունում: Միջոցառման գլխավոր հովանավորներն են «Էլիտ Պլազա» բիզնես կենտրոնը և Imagine Life-ը: Artsakh Career Expo-ի կազմակերպչական ընթացքը մեկնարկել է սեպտեմբերի 29-ից: Իրենց թափուր հաստիքները կներկայացնեն 40-ից ավելի գործընկեր կազմակերպություններ, այդ թվում՝ Galaxy Group of Companies-ը, Food Republic Yerevan-ը, Yeremyan Projects-ը, Soft Construct-ը, Ucom-ը, Globbing-ը: Էքսպոյի շրջանակներում լինելու են կրթական ծրագրեր, որոնք ներկայացնելու են Teach for Armenia-ն, MEDU-ն և Marketers Community The First Business School in Armenia-ն: ICF-ը՝ լինելով միջազգային քոուչինգի ֆեդերացիա, ներգրավելու է իր մասնագիտացված քոուչերին, ովքեր ունենալու են կարիերայի և անձնային աճի թեմայով մասնագիտական ելույթներ: Միջոցառումը կրում է բարեգործական բնույթ և կոմերցիոն շահ չի հետապնդում։