Արցախի ՄԻՊ-երը դիմել են Ջեյ Դի Վենսին՝ գերիների և անհայտ կորածների հարցով

ԱՄՆ փոխնախագահ Ջեյ Դի Վենսի տարածաշրջանային այցի նախաշեմին Արցախի մարդու իրավունքների պաշտպանները Վաշինգտոնին կոչ են արել հումանիտար խնդիրները դարձնել խաղաղության գործընթացի առանցքը:

Գեղամ Ստեփանյանի և Արտակ Բեգլարյանի կողմից փոխնախագահի գրասենյակ ուղարկված պաշտոնական նամակում նշվում է, որ նախագահ Թրամփի «Միջազգային խաղաղության և բարօրության ուղի» (TRIPP) նախաձեռնության հաջողությունը մեծապես կախված է Բաքվում պահվող հայ պատանդների ազատ արձակումից և անհայտ կորածների ճակատագրերի պարզաբանումից:

Իրավապաշտպանները շեշտում են, որ առանց խորը հումանիտար վերքերի ապաքինման և անհայտ կորածների որոնման չեզոք մեխանիզմի ստեղծման, տարածաշրջանային կայունությունը կմնա խոցելի: Ուղերձում հատուկ անդրադարձ է կատարվում Բաքվի բանտերում գտնվող 19 հայերի, այդ թվում՝ Արցախի նախկին ղեկավարության նկատմամբ կայացված ցմահ դատավճիռներին, որոնք որակվում են որպես խաղաղության հասնելու ճանապարհին առկա լրջագույն խոչընդոտ:

Հեղինակները հորդորում են ԱՄՆ վարչակազմին Բաքվում կայանալիք բանակցությունների ժամանակ առաջնահերթություն տալ մարդու իրավունքների պաշտպանությանը՝ ընդգծելով, որ արդար և արժանապատիվ խաղաղությունը պահանջում է հստակ բարոյական հանձնառություններ և բոլոր գերիների անհապաղ վերադարձ: