Ուորլիք. Համանախագահները տարածաշրջան շտապ այցելելու ծրագրեր չունեն

«Համանախագահները տարածաշրջան շտապ այցելելու ծրագրեր չունեն, սակայն մենք կշարունակենք պահել կապը հակամարտության կողմերի հետ»: Այս մասին ԱՊԱ-ին ասել է ԵԱՀԿ Մինսկի խմբի ամերիկացի համանախագահ Ջեյմս Ուորլիքը :

Վերջինիս խոսքով, հուլիսի 11-ին Վիեննայում կայացած հանդիպման ժամանակ համանախագահները Մինսկի խմբի անդամներին տեղեկացրել են վարվող բանակցությունների մասին, այդ թվում և ԱՄՆ պետքարտուղար Ջոն Քերիի և ՀՀ ու Ադրբեջանի նախագահների հանդիպումների մասին, որոնք տեղի ունեցան ՆԱՏՕ-ի գագաթաժողովի շրջանակում: Խոսվել է նաև ՌԴ նախագահ Վլադիմիր Պուտինի՝ Սանկտ Պետերբուրգում նախաձեռնած նախագահների հանդիպման մասին:

«Համանախագահող երկրները կշարունակեն ջանքեր գործադրել կողմերի միջև խաղաղության համապարփակ համաձայնագիր կնքելու գործընթացում առաջընթաց ապահովելու նպատակով, ինչպես նաև ԵԱՀԿ դիտորդական առաքելության ընդլայնման և հետաքննության մեխանիզմների ներդրման համար»,- ընդգծել է Ուորլիքը:

Նշենք, որ ավելի վաղ ՄԽ ռուսաստանցի համանախագահող Իգոր Պոպովը ասել էր, որ համանախագահները մտադիր են այցելել տարածաշրջան, սակայն ժամկետները դեռ հայտնի չեն: