ԱԺ-ում լրագրողների համար որոշակի սահմանափակումներն անհրաժեշտություն են․ ՔՊ-ական

«ԱԺ-ում լրագրողների համար հատուկ աշխատանքային գոտու ձևավորումը և դրանից դուրս որոշակի սահմանափակումների կիրառումը անհրաժեշտություն է և հուսով եմ ԱԺ աշխատակազմը կգնա այդ ճանապարհով։ Այս մասին գրել է «Քաղաքացիական պայմանագիր» կուսակցության անդամ Վահագն Ալեքսանյանը՝ անդրադառնալով ԱԺ-ում լրագրողների համար որոշ սահմանափակումներ մտցնելու վերաբերյալ խոսակցություններին։


"Չեմ հասկանում, թե ինչով է պայմանավորված ընդդիմադիր պատգամավոր Թագուհի Թովմասյանի զարմանքը։


Տիկին Թովմասյանը չի՞ տեսել այն բազմաթիվ կադրերը, երբ որոշ լրագրողներ ուղղակի թքած ունենալով էթիկայի բոլոր նորմերի վրա հետապնդում են պատգամավորներին, առանց թակելու բացում պատգամավորների դռները, պատգամավորների խնդրանքից հետո հրաժարվում փակել դրանք, խանգարում պատգամավորների աշխատանքին, ամբողջ շենքում խաթարում աշխատանքային մթնոլորտը, միայն թե կարողանան մի սենսացիոն հարց հնչեցնել ու անգամ չսպասել դրա պատասխանին։


Կարծում եմ՝ եթե կայացվի նման որոշում, ապա դրանից կշահեն նաև պարկեշտ լրագրողները, որոնք մեծամասնություն են կազմում, սակայն ցավոք լուռ են իրենց գործընկերների կողմից էթիկայի նորմերի ամենակոպիտ խախտումների հարցերով, իսկ նման որոշումից հետո, երբ կարգազանց լրագրողները այլևս զրկված կլինեն նման անթույլատրելի պահելաձև դրսևորելու հնարավորությունից, ավտոմատ կերպով կզրկվեն նաև լրագրողական համայնքի անունը արատավորելու հնարավորությունից, քանի որ իրենց այդօրինակ պահելաձևով նախևառաջ թիրախավորում ու խոցելի էին դարձնում հենց իրենց գործընկեր լրագրողներին»,-Facebook-ի իր էջում գրել է նա։


Ավելի վաղ Թագուհի Թովմասյանը հայտնել էր, որ իրեն հասած տեղեկությունների համաձայն՝ խորհրդարանում լրագրողների տեղաշարժը սահմանափակելու որոշում է կայացվել։ Լուրերը ճշտելու համար նա դիմել է ԱԺ աշխատակազմի ղեկավար-գլխավոր քարտուղարին:


 

Տպել

Թեմայի այլ նորություններ
Загрузка...