Արձանագրենք՝ ԳՇ պետի զգուշացումներից հետո Փաշինյանը գնաց ամենավատ պայմանների. Աբրահամյան

ՀՀ ԶՈՒ գլխավոր շտաբի պետը փաստացի արձանագրում է, որ պատերազմից դեռ մի քանի ամիս առաջ տեղեկացրել է, որ այլևս մեր թշնամին միայն Ադրբեջանը չէ, այլև Թուրքիան, դա զեկուցվել է ՀՀ քաղաքական ղեկավարությանը և, փաստորեն, այդ ամիսների ընթացքում երկրի քաղաքական, դիվանագիտական կորպուսը չի կարողացել կանխել  պատերազմը: Այսինքն, չի տարվել աշխատանք մեր դաշնակից պետությունների հետ, հարևան և տարածաշրջանային պետությունների հետ: Այս մասին VERELQ-ի հետ զրույցում ասաց Արցախի նախագահի նախկին խորհրդական, «Հենակետ» վերլուծական կենտրոնի ղեկավար Տիգրան Աբրահամյանը՝ մեկնաբանելով ՀՀ ԶՈՒ ԳՇ պետ Օնիկ Գասպարյանի այսօրվա հայտարարությունը:


Աբրահամյանի խոսքով, ևս մեկ և ոչ պակաս կարևոր արձանագրում կա այս ուղերձում. Օնիկ Գասպարյանը փաստորեն նշում է, որ պատերազմի չորրորդ օրը կայացած Անվտանգության խորհրդի նիստում զեկուցել է ընդհանուր իրավիճակը և նշել, որ երկու-երեք օրվա ընթացքում անհրաժեշտ է միջոցներ ձեռնարկել պատերազմը կանգնեցնելու համար, հակառակ դեպքում "այս ինտենսիվությամբ վարվող մարտական գործողությունների պարագայում մեր ռեսուրսները սեղմ ժամկետում կսպառվեն և յուրաքանչյուր հաջորդ օրերի ընթացքում ունենալու ենք բանակցային գործընթացի համար ավելի ոչ բարենպաստ պայմաններ":


"Փաստացի սա եղել է հենց այն ժամանակ, երբ Ռուսաստանը ևս առաջարկ էր ներկայացրել հրապարակային՝ նախ, ՌԴ արտգործնախարարության, ապա նախագահ Վլադիմիր Պուտինի շուրթերով: Այդ առաջարկը, հիշեցնեմ, եղել էր հրապարակային, և իր պայմաններով էականորեն տարբերվում էր այն պայմաններից, որոնք ունեցանք պատերազմի 44-րդ օրը Նիկոլ Փաշինյանի ստորագրած պայմանագրով: Փաստացի Հայաստանի քաղաքական իշխանությունը և անձամբ Նիկոլ Փաշինյանը ԶՈՒ ԳՇ պետից ստացել էր իրավիճակի մասին հստակ գնահատական և հորդոր ամեն գնով կանգնեցնել պատերազմը, սակայն այդ ուղղությամբ կա՛մ ջանքեր չեն գործադրվել, կա՛մ այդ ջանքերը եղել են ոչ բավարար",- նշեց նա:


Հիշեցնենք, հոկտեմբերի սկզբին Սերգեյ Լավրովը հայտարարեց, որ "հայկական զինված ուժերի հեռացումը հինգ շրջաններից պետք է ուղեկցվի անվտանգության երաշխիքներով, Հայաստանի ու Ղարաբաղի միջև հուսալի միջանցքով, իսկ վերջնական կարգավիճակի հարցը պետք է որոշվի դրանից հետո: Նա նաև նշել էր, որ խաղաղապահները Ղարաբաղում տեղեկայելը կորոշվի բանակցությունների շրջանակում:


Փաստ է, շարունակեց Աբրահամյանը, որ եղել են առաջարկներ մեզ համար համեմատության մեջ շատ ավելի նպաստավոր պայմաններով պատերազմը կանգնեցնելու՝ Ռուսաստանի միջնորդությամբ, սակայն Նիկոլ Փաշինյանը, ունենալով ԶՈՒ Գլխավոր շտաբի իրավիճակի մանրամասնբնութագրիչները և վտանգավոր ելքերը, փաստացի ժամանակին չի օգտագործել մի քանի տարբերակներ  և չի գնացել պատերազմի կանխմանը.


"Արդյունքում նա գնաց ամենավատ պայմաններով պատերազմի դադարեցմանը",- շեշտեց Տիգրան Աբրահամյանը: 


VERELQ-ը հիշեցնում է, որ ավելի ուշ, հոկտեմբերի 21-ին էլ Փաշինյանը հայտարարեց, որ "այս փուլում Լեռնային Ղարաբաղի հարցը դիվանագիտական լուծում չունի և բոլոր այն հույսերը, առաջարկները, թե պետք է դիվանագիտական լուծում գտնել, առավել ևս այս իրավիճակում պետք է համարենք ավարտված": Ուշագրավն այն է, որ հենց այդ պահին ՀՀ արտաքին գործերի նախարար Զոհրաբ Մնացականյանը գտնվում էր Մոսկվայում և հանդիպում էր ՌԴ ԱԳ նախարար Սերգեյ Լավրովի հետ: Մոսկվայում էր նաև Ադրբեջանի արտգործնախարարը:


 

Տպել

Թեմայի այլ նորություններ
Загрузка...