Պարոն նախարար, հետ տարեք այս օրինագիծը. Նաիրա Զոհրաբյանի խիստ քննադատությունը

156

«Բարգավաճ Հայաստան» խմբակցության անունից պատգամավոր Նարիա Զոհրաբյանը Ազգային ժողովում այսօր՝ մարտի 30-ին, խիստ քննադատեց կառավարության ներկայացրած օրենսդարական փոփոխությունների նոր փաթեթը, որով կորոնավիրուսի համաճարակի տարածման կանխարգելման նպատակով առաջարկվում է վերահսկել մարդկանց տեղաշարժը և հեռախոսային զանգերը:


«Լուսավոր Հայաստան» խմբակցության ղեկավար Էդմոն Մարուքյանի նման նա ևս մատնանշեց առկա իրավիճակում սոցիալ-տնտեսական խնդրիների լուծման կարևորությունը:


Զոհրաբյանը նախ դիմեց նախարար Ռուստամ Բադասյանին. «Պարոն նախարար, հետ տարեք այս օրինագիծը: Սա հետընթաց է ժողովրդավարությունից: Դուք աննպատակ ու անիմաստ գործ եք անելու»:


Այնուհետև պատգամավորը խոսեց ռեսուրսների վատնման մասին: - Այդ հսկայական ռեսուրսները, որ ծախսելու եք մեզ տեղորոշելու համար, այդ ռեսուրսները ծախսեք սահմանների բոլոր մուտքերին թեստեր դնելու համար: Այդ ռեսուրսները ծախսեք չաշխատող կամ օրավարձով աշխատող մարդկանց բեռը թեթևացնելու համար», - ասաց նա:


Այնուհետև նա մի դեպք պատմեց. «Այսօր իմ հեռախոսին նակամակ է եկել: Մի տղամարդ գրում է՝ ևս մի քանի օր և ես խանութից գողություն եմ անելու: Սա ուղղակի զարհուրելի է»: «Այս խնդիրները լուծեք» - հորդորեց նա:


Նրան հակադարձեց «Իմ քայլը» խմբակցության անդամ Ռուբեն Ռուբինյանը,որի կարծիքով հեռախոսազանգերի ֆիքսումն ու մարդկանց տեղորոշումը վարակակիր անձի կոնտակտավորներին պարզելու համար փոխլրացնող գործիքներ են:


«Եթե միայն տեղորոշումը լինի, որը հնարավոր է իրականացնել 100-150 մետր շառավղով, ապա շատ մեծ թվով մարդիկ կարող են հայտնվել դիտարկման դաշտում: Իմ ընկալմամբ՝ հեռախոսազանգերի ֆիքսումը ներդրվել է, քանի որ այդ օրերի ընթացքում, եթե մեկը զանգել է վարակակիր մարդուն և եղել է նրա տեղորոշման վայրից ոչ հեռու, մեծ է հավանականությունը, որ նրանք շփված լինեն», - ասաց նա:


Ռուբեն Ռուբինյանը հարց բարձրացրեց՝ արդյոք սա ամբողջովին լուծում է խնդիրը և պատասխանեց. «Միանշանակ, ոչ: Կան այլ ծրարգրեր, որոնցով մարդիկ շփվում են: Բայց արդյոք, եթե մի միջոցառում 100 տոկոսով չի լուծում խնդիրը, պետք է համարվի վատ միջոցառում՝ չեմ կարծում: Մենք գործ ունենք համաճարակի հետ և չկա 100-տոկոսանոց արդյունավետությամբ միջոցառում»։


 


 

Տպել

Թեմայի այլ նորություններ
Загрузка...