Այլևս երբեք. Փաշինյանը ողջունեց Ներկայացուցիչների պալատում Հայոց ցեղասպանության ճանաչումը

ՀՀ վարչապետ Նիկոլ Փաշինյանը գրառում է կատարել իր Twitter-յան էջում՝ ողջունելով Հայոց Ցեղասպանության ճանաչման վերաբերյալ ԱՄՆ Ներկայացուցիչների պալատի պատմական քվեարկությունը։

«Ողջունում եմ Հայոց ցեղասպանության ճանաչման վերաբերյալ ԱՄՆ Կոնգրեսի Ներկայացուցիչների պալատի պատմական քվեարկությունը։ Բանաձեւը հզոր քայլ է պատմական արդարության ու ճշմարտության ուղղությամբ, որը նաև մխիթարանք է հաղորդում Հայոց ցեղասպանությունից փրկվածների ժառանգներին։ Ընդունեք իմ սրտանց շնորհավորանքներն ու հիացմունքն ուղղված ամերիկահայերի սերունդներին, ում անձնազոհ քաղաքական ու հասարակական գործունեությունն ու հաստատակամությունն էին այս պատմական քվեարկության շարժիչ ուժն ու ոգեւորությունը։ Այլեւս երբեք»,- գրել է վարչապետ Փաշինյանը։

Նշենք, որ ԱՄՆ Կոնգրեսի Ներկայացուցիչների պալատում հոկտեմբերի 29-ին կայացած քվեարկության արդյունքում ձայների մեծամասնությամբ ընդունվեց Հայոց ցեղասպանությունը ճանաչող բանաձևը։ Քվեարկությանը մասնակցած կոնգրեսականներից կողմ քվեարկեց 405-ը, դեմ՝ 11-ը։

Ի դեպ, 11 դեմ քվեարկած կոնգրեսականներից մեկը՝ Գրեգ Փենսը, ԱՄՆ փոխնախագահ Մայք Փենսի ավագ եղբայրն է: