Մի միջամտեք ընտրություններին. Թրամփ-Պուտին 1,5 ժամ տեւած հանդիպումն ավարտվել է

Ճապոնիայի Օսակա քաղաքում, որտեղ տեղի է ունենում G20 երկրնրի ղեկավարների գագաթաժողովը, ավարտվել է ԱՄՆ նախագահ Դոնալդ Թրամփի և ՌԴ նախագահ Վլադիմիր Պուտինի հանդիպումը:

Ինչպես հայտնում է ՌԻԱ Նովոստին, հանդիպումը 1,5 ժամ է տևել: Երկու գերտերությունների նախագահները հայտարարել են, որ կողմերը, ինչպես նաև ամբողջ աշխարհը, շահագրգռված են, որ հարաբերությունները բարելավվեն, հայտնում է:

Սպիտակ տան Twitter-ում հրապարակված հաղորդագրություներից տեղեկանում ենք նախագահների քննարկած թեմաների մասին: «Նրանք նաև քննարկել են իրավիճակն Իրանում, Սիրիայում, Վենեսուելայում և Ուկարինայում»,-ասվում է Twitter-ում հրապարակված Սպիտակ տան հաղորդագրության մեջ:

Բացի այդ, Պուտինն ու Թրամփը պայմանավորվել են շարունակել բանակցությունները սպառազինությունների վերահսկման արդիական մոդելի շուրջ:

Բանակցությունների սկզբում ստեղծվել է հետաքրքիր իրավիճակ, երբ լրագրողները խնդրել են ԱՄՆ նախագահին հորդորել Պուտինին չմիջամտել ԱՄՆ ընտրություններին: Թրամփը Պուտինին կատակով խնդրել է չմիջամտել ընտրություններին: «Մի միջամտեք, մի միջամտեք ընտրություններին», - ժպտալով ասել է Թրամփը Պուտինին:

Այսպիսով Թրամփը կատարել է լրագրողերի խնդրանքը և երկու նախագահները ժպտացել են՝ դա լավ կատակ համարելով:

Սա Պուտինի և Թրամփի երկրորդ լիարժեք հանդիպումն է՝ մինչ այդ նրանք հանդիպել են Հելսինկիի գագաթնաժողովում 2018-ի հուլիսին: 2018-ի նոյեմբերին ծրագրվում էր նոր հանդիպում Փարիզում, սակայն այն ժամանակ բանակցությունները խափանվեցին, քանի որ ԱՄՆ-ն դուրս եկավ Միջին և փոքր հեռահարության հրթիռների ոչնչացման մասին պայմանագրից:

Հետո մտադրություն կար հանդիպելու դեկտեմբերին Բուենոս Այրեսում՝ G20-ի շրջանակում, սակայն Թրամփը հրաժարվեց հանդիպումից Կերչի նեղուցում ուկրաինացի նավաստիների ձերբակալության պատճառով: