Իրանի ԶՈւ ԳՇ պետ․ Թեհրանը կարող է փակել Հորմուզի նեղուցը

Իրանի բանակի գլխավոր շտաբի պետը հայտարարել է, որ Թեհրանը կարող է փակել Հորմուզի նեղուցը, եթե Իրանի նկատմամբ թշնամական վերաբերմունքը հասնի այն մակարդակի, որ դրանից հնարավոր չլինի խուսափել։

Գեներալ Մոհամադ Բաքերին երեկ Թեհրանում հայտարարել է, թե Իրանը «մտադիր չէ» փակել նավթի տարանցման միջազգային կարևորագույն այս ուղին, բայց եթե իրանական նավթը այդ ուղով չի անցնելու, որևէ այլ երկրի նավթ չի կարող անցնել։

«Ներկայումս բոլոր նավերը նեղուցով անցնելիս պետք է պատասխանեն Իսլամական հեղափոխության պահապանների կորպուսի նավատորմի հարցերին», - ասել է նա՝ ավելացնելով, որ Միացյալ Նահանգների ռազմանավերը այդ պահանջին ենթարկվել են, և երբևէ խնդիր չի ծագել։

Պարսից և Օմանի ծոցերը կապող Հորմուզի նեղուցի նավարկուղիների մեծ մասը Օմանի ջրային տարածքում են։