Իրանն ու Ադրբեջանը երկաթգծի շինարարության մասին հուշագիր են ստորագրել

Իրանն ու Ադրբեջանը երկաթգծի շինարարության մասին հուշագիր են ստորագրել՝ հինգ միլիոն տոննա բեռ տեղափոխելու համար: Փոխըմբռնման հուշագիրը ստորագրվել է Իրանի և Ադրբեջանի տնտեսական հանձնաժողովի համատեղ նիստում Թեհրանում:

Հյուսիս-Հարավ երկաթգիծը կմիավորի Հյուսիսային Եվրոպան Հարավ-արևելյան Ասիայի հետ: Այն կապող օղակ կհանդիսանա Իրանի, Ադրբեջանի ու ՌԴ-ի երկաթգծերի միջև: Վերոնշյալ նախագիծը ենթադրում է իրանական և ադրբեջանական Աստարաների միջև սահմանային երկաթգծային կամրջի կառուցում և ութ կմ-ոց երկաթգծի շինարարություն Ադրբեջանի տարածքում, փոխանցում է sputnik.az-ը:

Մինչ այդ, ադրբեջանական Աստարա քաղաքում կայացել է ադրբեջանա-իրանական առևտրա-տնտեսական և հումանիտար համագործակցության համատեղ հանձնաժողովի համանախագահներ, Ադրբեջանի էկոնոմիկայի և արդյունաբերության նախարար Շահին Մուստաֆաևի և Իրանի կապի և տեղեկատվական տեխնոլոգիաների նախարար Մահմուդ Վաեզիի հանդիպումը ընդլայնված կազմով:

Ադրբեջանի էկոնոմիկայի նախարարը նշել է, որ հանդիպման հիմնական նպատակը Հյուսիսի-Հարավ նախագծի արդյունավետության բարձրացումն է, նոր նախագծերի նախապատրաստումը և այդ ուղղությամբ աշխատանքների քննարկումը: Նախարարի խոսքով, Հյուսիս-Հարավ տրանսպորտային նախագծի իրականացումը երկու երկրներին քաղաքական և տնտեսական դիվիդենտների կբերի, փոխանցում է ԱՊԱ-ն:

Իրանցի նախարարը նշել է որ Ադրբեջանի ու Իրանի տարածքով անցնող տրանսպորտային միջանցքը ոչ միայն կապող օղակ կհանդիսանա Իրանի ու Ադրբեջանի տարանցիկ ուղիների համար, այլ բարենպաստ պայմաններ կստեղծի Եվրոպայից դեպի Հնդկաստան բեռնափոխադրումների իրականացման համար: