Բրիտանական ռազմաօդային ուժերին՝ ռուսական կործանիչներին հարված հասցնելու հրամանի մասին բրիտանական ԶԼՄ-ներում տեղ գտած տեղեկատվությունը սադրանք է: Այդ մասին VERELQ-ի հետ զրույցում հայտարարել է ռուսաստանցի ռազմական փորձագետ, Ազգային պաշտպանություն հանդեսի գլխավոր խմբագիր Իգոր Կորոտչենկոն:
Daily Star Sunday-ը, հղում անելով ՊՆ-ում իր աղբյուրներին նշել էր, որ բրիտանական ռազմաօդային ուժերի Տորնադո ինքնաթիռներին հրաման է տրված խոցել Իրաքում ռուսական ինքնաթիռները: ՌԴ ՊՆ-ը իր հերթին խնդրել է Մեծ Բրիտանիայի ռազմական կցորդին պաշտոնական բացատրություններ ներկայացնել այդ տեղեկատվության հետ կապված: Մեկ օր անց Լոնդոնը հերքել է այդ տեղեկատվությունը՝ հղում անելով հրապարակման անճշտության վրա:
Դրա հետ կապված Կորոտչենկոն հիշեցրել է, որ ռուսական կործանիչները չեն թռչում Իրաքի օդային տարածքում: Ռուսական օդուժը մարտական առաջադրանքներ է կատարում միայն Սիրիայի երկնքում: Նրա խոսքով, բաց այդ, եթե անգլիական ռազմական գերատեսչության մոտ որևէ հարց է առաջանում, ապա այդ հարցերը պարզաբանելու համար, որևէ միջադեպերից խուսափելու համար գոյություն ունի նորմալ բանակցային խողովակ:
«Օրինակ, Պենտագոնի և ՌԴ ՊՆ-ի միջև ուղիղ կապ է հաստատվել և փակ տեսակոնֆերանսների միջոցով օդում ռազմական միջադեպերի հետ կապված բոլոր հարցերը լուծում են գտել: Դա այժմ ոչ ոք չի անհանգստացնում: Մեծ Բրիտանիան կարող էր գնալ հենց այդ ճանապարհով, խորհրդակցությունների ուղով: Դրա փոխարեն նրանք հիմար սադրանքներ են իրականացնում, և ինձ հայտնի չէ, թե ինչ դրդապատճառներից են ելնում բրիտանական իշխանությունները »,-նշել է Կորոտչենկոն:
Փորձագետը մեկնաբանել է նաև ռուսական կործանիչների մասնակցությամբ Թուրքիայի օդային տարածքը խախտելու միջադեպերը, ինչը բացատրվում էր եղանակային պայմաններով: Կորոտչենկոն կարծում է, որ ՌԴ-ի և Թուրքիայի ԳՇ-ի միջև տեղի են ունեցել բանակցություններ այդ հարցով, բոլոր բացատրությունները տրվել են և միջադեպը կարելի է սպառված համարել:
Անկարայում, սակայն, այդ հարցի շուրջ աղմուկը չի դադարում: Թուրքիայի ԱԳՆ պաշտոնական ներակայուցիչ
Թանջու Բիլղիչը հայտարարել է, որ Անկարան ՌԴ-ից ռազնական պատվիրակություն է սպասում՝ Թուրքիայի օդային տարածությունը խախտելու հետ կապված հարցը քննարկելու համար: Բիլղիչը նաև նշել է, որ իրենք ՆԱՏՕ-ի հետ երկկողմ մակարդակով բանակցություններ են վարում Թուրքիայի պաշտպանության հետ կապված, ինչպես նաև Փեթրիոթ համակարգերի շուրջ:
Անդրադառնալով Անկարայի կողմից այդ սպառնալիքներին, Կորոտչենկոն հայտարարել է, որ ՌԴ-ը Սիրիայում լուծում է այն խնդիրները, որոնք անհրաժեշտ է համարում՝ ականջալուր չլինելով Թուրքիայի դիրքորոշմանը:
Թուրքերը կարող են դիմել, ուր որ ցանկանան: ՌԴ-ը գերտերություն է, նա լուծելու է իր հարցերը, չնայած տեղեկատվական աղմուկին և բղավոցներին: Ոչ մի սադրանք չի կարող սասանել Մոսկվայի կամքը՝ պաշտպանելու սեփական ազգային շահերը: Այնուամենայնիվ, ինձ թվում է, որ Թուրքիան հասկանում է հնարավոր ռիսկերը և բարդությունները: Նա հավելել է, որ Անկարան գործելու է զգուշավոր և չի գնա որևէ հակաքայլերի:
