Վարչապետ. ԵԱՏՄ գործընկերները կքննարկեն առևտուրը ռուբլով իրականացնելու Հայաստանի առաջարկը

Եվրասիական տնտեսական միության (ԵԱՏՄ) գործընկերները մինչև տարվա վերջ կքննարկեն մի շարք ռազմավարական ապրանքների վաճառքը ռուբլով իրականացնելու Հայաստանի առաջարկը: Այդ մասին այսօր լրագրողների հետ զրույցում հայտարարել է ՀՀ վարչապետ Հովիկ Աբրահամյանը:

Համապատասխան առաջարկությամբ Հայաստանի վարչապետը հանդես է եկել նախորդ շաբաթ Գրոդնոյում՝ ԵԱՏՄ-ի վարչապետների հանդիպման ժամանակ: Նրա խոսքով, ԵԱՏՄ-ը պետք է ջանքեր գործադրի միմյանց հետ առևտրի ժամանակ ազգային արժույթին անցնելու և դոլարիցազիայի մակարդակի նվազման համար: Վարչապետը կարևորել է նաև մակրոտնտեսական քաղաքականություն իրականացնելիս փորձի փոխանակումը:

«Այդ կոնտեքստում կարևոր է ռազմավարական ապրանքների (նավթ, գազ) փոխադարձ առևտրի ռուբլով իրականացումը՝ առանց դոլարին փոխկապակցելու»,-նշել է վարչապետը:

Աբրահամյանը կարծում է, որ այդ գործընթացը ենթադրում է երկար և քրտաջան աշխատանք: Պատասխանելով այն հարցին՝ արդյոք ձեռնտու է մյուս ԵԱՏՄ-ի երկրներին անցումը ռուբլուն, Աբրահամյանը ասել է, որ խոսքը գնում է ՀՀ ռազմավարական դաշնակիցների մասին և չէր խանգարի այդ գործընկերին որոշ չափով զոհաբերել իրենց շահերը՝ հանուն ՀՀ-ի շահերի:

«Առաջարկությունն առաջին հերթին վերաբերվում է էներգակիրներին: Մենք փորձելու ենք հասնել նրան, որ Հայաստանի գազի մատակարարումների համար վճարի ռուբլով, քանի որ դոլար-դրամ տատանումները շատ բացասական ազդեցություն են ունենում մեր բնակչության վճարունակության վրա»,-նշել է նա:

Անդրադառնալով ՀՀ-ի տնտեսական իրավիճակին՝ վարչապետը հաստատել է մինչ այդ հրապարակված տվյալները, որ այս տարվա առաջին կեսին հանրապետությունում գրանցվել է 4.4%-ոց աճ: «Այլ բան է, որ բնակչությունը իր վրա չի զգում աճի ազդեցությունը: Դրա համար անհրաժեշտ է երկնիշ տնտեսական աճ», - նշել է Աբրահամյանը:

Եվրասիական տնտեսական հանձնաժողովի կանխատեսումներով Հայաստանը տարին կփակի 0.9%-ով ՀՆԱ-ի աճով: