ԵԽԽՎ մի շարք անդամներ կոռուպցիոն կապեր են հաստատել Բաքվի հետ․ Եվրախորհուրդ

Տասն ամիս տևած հետաքննության արդյունքում Եվրոպայի խորհուրդը պարզել է, որ կազմակերպության Խորհրդարանական վեհաժողովի մի շարք անդամներ խախտել են կառույցի էթիկայի նորմերը՝ «կոռուպցիոն բնույթի» կապ հաստատելով Ադրբեջանի իշխանությունների հետ:

Այդ մասին ասված է կազմակերպության 219-էջանոց հետաքննության մեջ, ըստ որի, Բաքուն ջանքեր է գործադրել ներազդելու Վեհաժողովի վրա՝ նվազեցնելու Ադրբեջանում անցկացված ընտրություններին վերաբերող քննադատությունը:

Ապրիլի 11-ին Ադրբեջանում անցկացված արտահերթ նախագահական ընտրություններում, հիշեցնենք, վերընտրվեց գործող նախագահ Իլհամ Ալիևը՝ քվեների շուրջ 86 տոկոսով: Ընտրությունների ընթացքին հետևած միջազգային դիտորդները հայտարարեցին, մասնավորապես, որ «Ադրբեջանում տիրող քաղաքական միջավայրում ազատ և արդար ընտրությունների անցկացումն անհնարին է»: